Mosia nena intehkhin hnu ah Isua angin intehkhin leh

Chief minister Lalduhoma chu Mizoram chief minister zinga a lim hawng hmasa ber, Mosia anga intehkhin hmasa ber, tunah Isua nena intehkhin leh a ni tih Congress hruaitu Zodintluanga chuan a sawi.
Thawhlehnia Chhinga Venga Congress party unit ho intuaitharna a hmanpuinaah MPCC vice president Zodintluanga chuan, mipuiin kalphung thara kal tura an inpeih em em lain, ZPM sawrkar zawkin kalphung thara kal a tlin tawh lo nia sawiin, chief minister Pu Lalduhoma chu kan ram hruaitu lu ber a nih angin, an khalh ngil theih hlauh takin a tih dikloh an sawi zel dawn a, chu chu Mizoram tana ti an ni tih a sawi.
“Kum 2023 inthlan dawnah Pu Lalduhoma hian thuneihna mi pakhatin a chan tam lutuk chuan hmansual a ni thin a, chuvangin ZPM chuan thuneihna insemzai kan kalpui dawn a, CM-in party president nih a kawp a rem loang. tiin a intiam a, mahse tunah chuan Pathian pawhin a thuthlung a thlak thin, tia inthiam chawpin, party president nihna a chang zui a, thuneihna a pumbilh der tawh,” a ti.
Pu Lalduhoma chu Mizoram chief minister zinga ama lim hawng hmasa ber a ni a, Mosia anga intehkhin hmasaber, tunhnai maiah Isua nena intehkhin leh bawk tih MPCC hruaitu hian a sawi.
Aizawl East II biala hmasawnna ruhrel lian tam ber chu Congress sawrkar laia din leh sak deuh vek an ni tih minister hlui Zodintluanga hian a sawi a. Dawrpui Multipurpose Centre, Saron Veng Indoor Stadium, Armed Venga basketball indoor stadium, Chhinga Veng kawrpui lian siamthat hna leh inkalpawhna ruhrel chu Congress hunlaia siam an ni tih a sawi.
“Hmasawnna ruhrel kan siam hi a tam khat hle a, kan hnathawh leh kan hmalakna kan theihnghilh zah hi ZPM hian an la thawk lo tih hi ka sawi ngam,” a ti.