KMMTTP kawng leh a pawh zel tur kawng siam tawh dan chin thlirho
Kaladan Multi Modal Transit Transport Project kawng chin leh Myanmar lama a pawh zel tur kawng, India sawrkarin a siam mek dana thlen tawh chin leh chinfel ngai la awmte sawihoin Nilaini khan chief minister Lalduhoma kaihhruaiin Mizoram Pro -Active Governance and Timely Implementing (Mi-PRAGATI) chu a vawi 6-na atan an thukhawm.
Thutkhawm hmasaa an lo rel tawhte bawhzui dan thlirlet a nih bakah hmasawnna hnathawh mek dang enho a ni a. KMMTTP Mizoram chhunga thawh tawh chin, tuna chhe leh tawh tak chu a ranglama siamtha turin thutkhawma tel Ministry of Road Transport & Highways aiawh hriattir an ni a. Zangnadawmna la chinfel loh pawh chingfel thuai tura ngen an ni. Ministry of External Affairs hnuaia thawh Paletwa – Kaletwa – Zochachhuah inkar report ngaihthlak a ni a. Paletwa – Zorinpui inkar kawngpui thawh mek km. 109.2 a thui a ni a, physical progress 23.35% niin financial progress 30% a ni.
Sairang atanga Hmawngbuchhuah thlenga rel kawng sial tum Railways lamin hma an lak tawh chin an report a, Sairang Rel Station tihchangtlun hna thawh mek pawh sawifiah a ni. Railways hmalakna chungchang bik hi hun hranah chief minister kaihhruaia la sawiho tura dah a ni.
Indo- Bangladesh ramri hung leh kawngpui, Rajiv Nagar Segment chungchang an sawiho a. Online hmanga thutkhawm tel Ministry of Home Affairs aiawhten hma an lak tawh chin an sawifiah. Kawng chhe tawh lutuk chu a ranglama siamthat a tul tih sawi niin, harsatna dang pawh sawi a ni.
Heng bakah hian cyber crime leh digital arrest chungchanga Mizoram State Cyber Crime Coordination Centre hmalakna leh hnathawh, Aizawl to Tuipang national highway hnathawhin a nghawng, la chinfel loh thil thenkhat an sawi bawk.
An thil rel umzui dan tur ruahmanna an siam a, thutkhawm leh hunah enzui a ni ang.
Thutkhawmah a kaihhnawih minister ho – PWD minister Vanlalhlana, EF&CC minister Lalthansanga, Agriculture minister PC Vanlalruata leh official-te an tel a. Online-in Delhi leh Mizoram hmun hrang hrang atangin agenda kaihhnawih official-ten an zawm a ni.