Motley Crue ‘Kickstart My Heart’-in Spotify 1B stream a kai

Motley Crue ‘Kickstart My Heart’-in Spotify 1B stream a kai
Veteran metal band Motley Crue hla hlui ‘Kickstart My Heart’ chu Spotify-ah vawi tluklehdingawn stream a kai ta a, 1980s hlaah chuan he streaming site-a vawi tlukledingawn stream kai thei hmasa ber niin, Motley Crue hlaa hetiang zat stream kai thei hmasa ber a ni bawk.
He hla hi an studio album pangana, 1989-a an tlangzarh ‘Dr. Feelgood’ atanga an single a ni a, a lar vanglai, 1990 kum chawhma lamah khan Billboard Hot 100 chart-ah No.27 a kai a, singer Vince Neil, bassist Nikki Sixx, drummer Tommy Lee leh guitarist John 5 te pawhin he mellung an thleng thei hi nuam an ti hle a ni ang, an tluklehdingawn stream kai hriatpuia thla an lakpui an post-ah pawh an khi deuh sâng lawm a ni.
An thlalak an post caption-ah, “’Kickstart My Heart’ tluklehdingawn stream Spotify-ah a kai e. A va ropui em! Hetiang kan thlen theihna, khawvel hmun hrang hrang a Crueheads (an fan-te) chungah lawmthu vawi tluklehdingawn kan sawi mawlh mawlh. Hei hi in tan a ni e!” an ti.
He hla hi 1987-a an bassist Nikki Sixx heroin overdose avanga thih tep behchhana an phuah a ni a, Nikki Sixx hi paramedic ten annem nung leh hram a ni! He hla hi kumin American Idol finale-ah judge te zinga mi, 2005 American Winner ni bawk Carrie Underwood nen an perform a, hei hian a rawn tilar thar ve leh ta a ni.
Motley Crue hi vawiin thlengin rimawi khawvelah an la active viau a, Tesla leh Extreme te nen Return of the Carnival of Sins tour an neih chu North American leg September 26 khan an khar ziah a, Europe lamah an fehchhuah leh dawn a, an tour hian nakkum June thleng a awh dawn a ni.
Motley Crue sawi takah chuan 1982-a an debut studio album ‘Too Fast For Love’ kum 45 tlin champha pualin he album hi October ni 30 hian an tlangzarh thar leh dawn bawk e.