Teens Rock 2026 – The Battle of Bands Winner- Neuhof School Band
Yamaha Music India leh Trinity College London buatsaih Teens Rock 2026 – The Battle of Bands chu nizan khan grand finale neiin result puan a ni ta a, North East aiawha tel Neuhof School Band, Aizawl chu Pakhatna an ni a, Indian music maestro AR Rahman hnen atangin lawmman an dawng.
Neuhof School Band-ah hian an school-a Class-VIII leh Class-IX zirlai te vek an tel a, Vocalist- Sylvia C Lalmuankimi, Lead guitartist/backing vocals- Elnathan Vanlalnunzira Ralte, Bassist- Grace Vannunmawii, Drummer- Lalchhanchhuaha, Keyboardist- Lalthlamuani Pachuau & Robert Lal Din te an ni.
Neuhof School Band member-ah hian rimawi lama Mizo ten kan lo hriat lar tawh fate pawh an tel a, bassist Elnathan hi Mizo musician hriathlawh Victor the Scavenger fapa a ni a, bassist Grace-i pawh hi Mizo hlaphuahthiam leh zaipawl lama hming lo chher tawh T Laldintluanga fanu a ni bawk.
Neuhof School Band hian organiser lamin sak ngei ngei tur thlan theih an chhawp chhuah atangin Michael Jackson hla ‘Billie Jean’ anmahni version-in an perform a, hei bakah hian Mizo gospel rock band Magdalene hla ‘Eternal Life’ anmahni version-in an perform bawk.
He competition hi tum sarih an buatsaihna a ni tawh a, kum ruk vel an chawlh vang vang hnuah kuminah an rawn thar thawh leh ta a, intihsiakna hi Bengaluru-ah neih a ni a, he intihsiakna hi kum lama naupang zawk te zinga rimawi lama talent nei tha te zawn chhuah nana an buatsaih thin a ni.
Kumin hian tel tuma registration ti 680 chuang awmin, India ram hmun hrang hrang a school leh music academy atangin video 270 vel zet theh luh a ni a, video atang hian intihsiakna tak taka tel tur tlan leh an ni a, grand finale-ah hian band panga intihsiakin, judge-te zingah musician hriathlawh tak tak Ranjit Barot, Gulraj Sing leh Rhythm Shaw te an tel.
Intihsiaknaah hian India hi zone nga- North, East, West, South leh North East-ah thenin an video theh luh atangin zone hrang hrang aiawh turte hi thlan chhuah an ni a, Neuof School Band hi North East Zone aiawhin an tel a, Pakhatna an ni zui ta a ni.