Zu khapna dan kenkawh chungchangah sorkarin a tih tur a ti lo em ni?

CL.Thianga, Hnahlan

The Mizoram Liquor Prohibition (Amendment) Act 2025 hnuaiah Mizoramah zu khap kalpui mek a ni a. Hetih lai hian sorkarin phalna (license) a pek winery/brewery ten Mizorama thar chhuah thei leh thlai chi hrang hrang hmanga wine leh local fruit beer siam leh zawrh chu phal a ni a. Tun dinhmunah Hnahlan leh Champhaia winery te hi license neia kalpui an ni. Mizoramah hian sik leh sain a zir bawk a, thei leh thlai chi hrang hrang a tha duh hle a. Mizoram hi North East India a grape thar chhuak hnem ber kan ni a. Lakhuihtheih, sapthei, fu, bahla te pawh a tha duhin a tui bawk a, heng te pawh hi fruit wine siamnan a hman theih a ni.
Kum 2007 khan Mizo National Front (MNF) sorkar chuan The Mizoram Liquor Prohibition (Amendment) Act 2007 hmangin Mizorama tharchhuah grape leh thei dangte atangin wine siam leh zawrh phalna a pe a. Kum 2025-ah Zoram Peoples’s Movement (ZPM)-in huam zau zawk dan a rawn siam leh hi kuthnathawktu leh entrepreneur tan hmasawnna rahbi pawimawh tak a ni a. Hetianga hmalakna lo nei tawh sorkar hian fak an phu e. Sorkar lo awm leh tur pawhin he policy hi a hnungtawlh zawnga kalpui lova, hmasawnna lam hawia an kalpui a pawimawh a ni. North East Indiaah hian grape ni lo thei dang hmanga wine siam hi a lar chho mek a, Meghalaya leh Arunachal Pradeshah te hmalakna tha tak tak hmuh tur a awm a, Mizoram pawh hian theihna kan nei sang hle a ni.
Chanchinthar leh Zonet Cable TV talkshow ah te kan hmuh angin Sorkarin wine leh beer siam tum mimal/firm sawmpakhat (11) hnenah phalna a pe a. Hengho thilsiam erawh tun dinhmunah market-ah an la awm lo a, hralh chhuah theih a nih hma in FSSAI license, label registration, cost card etc an la tih fel ve a ngai dawn a ni. Heng wine leh beer te hi a factory atangin license nei stockist-in an la ang a, stockist hnen atangin zuar chhawng turin an la ve leh dawn a ni. Heng phalna neia siam hian License fee, label fee, VAT 16% leh Excise Duty litre khat zelah Cheng sawm (Rs. 10) an chawi dawn a ni. Mihring in tura siam alcohol telna hi GST hnuaiah a awm ve lo tih hriat a tha awm e. Heng wine leh beer siamnan hian Mizorama tharchhuah ngei thei/thlai hman tur a ni a, distillation (thlawr) phal loh a ni bawk. Mizoramah ‘barley’ kan thar ve miau loh avangin thei atanga siam kha ‘beer’ a tih theih em tih erawh zawhna awm thei a ni. Sorkar pawhin heng winery/brewery te hi uluk taka a vil zui a ngai dawn a ni.
Sorkar atanga phalna (license) nei lo in a siam wine leh beer chu zu dang ang bawkin man theih a ni a. Mizo zufâng leh zu pui pawh siam phal loh a ni. Zufâng leh zupui hi sorkarin dan hnuaia siam theih tura telh an tum a, mahse Assembly Session ah Bill an sawiho hmain kohhran hruaitu te’n Chief Minister hnenah an remtih loh thu an thlen a, sorkar pawhin an telh ta lo a nih kha. Hetiang a nih lai hian sorkar atanga phalna nei lova siam zufang, wine leh beer chi hrang hrang zuar an tam hle a, kan festival hrang hrangahte pawh langsar takin an zuar a, thalakte pawh social media-ah hmuh tur a awm a ni. Kan hma lawkah festival chi hrang hrang lo awm turah pawh an zuar leh tho a rinawm. Hei hi The Mizoram Liquor Prohibition (Amendment) Act 2025 kalh a ni a. Dan bawhchhia man chu hremna pawh kum khat (1) atanga kum nga (5) thleng lung in tan theihna leh lei chawi theihna a awm a ni.
Hetiang festival, fair leh exhibition te hi sorkar department hmalakna a nih ve avangin ministry atanga ORDER khauh tak a awm loh chuan Excise department a thawkte tan pawh festival-a an zawrh va man sak leh a neitu case siamsak kha thil chakawm tak a ni lem lo ang. Hei vang hian sorkar hian an dan siam hi khauh taka ken kawh hi a tih makmawh a ni. Phalna nei loa alcohol telna siam leh zawrh hi en liam mai chi a ni lo a, quality control awm mang lo in hi hriselna atan pawh a pawi thei a, methyl alcohol te an siam palh hlauh chuan chhiatna a thleng thei a, sorkar tan mualphona a ni ang. Vai rama zu chhe in vanga thihna (hooch tragedy) ang em kan la tawng lo zawk a. License nei hi chu sorkarin tehkhawng hrang hrang a siam paltlang tawh an ni a, license fee, label registration fee, chiah (VAT) sorkarah an chawi a. License nei ve lo nen hrut rual chi an ni lo a. Sorkar hian dan awmsa hi khauh takin kalpui se kan zavaia tan himna tur a ni e.
India ram State dang zu an zawrhnaah pawh festival, fair leh exhibition-ah te alcohol telna an zuar dawn a nih chuan State Excise atangin phalna neia kalpui a ni thin a. Dan hnuaia siam leh zawrh phal chauh a dah theih a ni. Mizorama kan kalpui dan erawh kan inenfiah deuh a ngaiin a lang. Sorkar dan siam sorkar bawkin a palzut leh mai chuan thil fel lo tak a ni. Dan anga kalpui hi sorkar tan leh stake holder hrang hrang bakah mipui tan pawh a him ber tih hi kan thupui ni mawlh rawh se.