SUSTAINABLE, INTEGRATED FARMING IN MIZORAM – 40

RK Dawla
Mb 9366095658

1. October thla kan kai ta. Calendar en chuan, kumin hun hmun 4-a thena hmun 3 chu kan hmang zo leh ta a. Sik leh sa pawh a nuam chho ta viau mai. Buh thar rang kan seng tan a, buhpui (thar tlai) pawh a par tan a. Pi leh pu atanga chaw rinpui bera kan la neih ngar ngar buh hi, mi tam ber chuan kan la thlah hlei thei lova, thangthar lo awm lehzel turte pawhin hun rei tak chhung chu chaw kan tih chuan BUH a la kâwk rengin a rinawm. Heti a nih vang hian, buh chin lamah tan kan lâk mar a ngai reng a. Tui tlin reng theihna hmunah lo chuan, kumhlunin buh hi kan ching meuh lova. Khawvel a changkang zel a, buh chin leh thar kawngah pawh hmanrua leh thiamna thar zawk a lo chhuak zel a. Leilet bialah mihring, bawng, sakawr leh lawi hmanga lei letin, power tiller leh tractor nen kan che changkang chho zel a. Tunah chuan hnim thlawhna, buh phunna, buh sengna leh vuakna thlengin khawl kan hmang uar ta hle.
2. Hetih mêk lai hian khawl changkang leh chemical fertilizers nena buh enkawl hi duh khawp lohna leh tlo tâwk lova hriatna a lo piang chho mêk a. Buh chinna leilet pawh tui tlintir reng ai chuan, regular taka tui dahluh leh dah chhuah bâkah buh tiak tîr tê phun kha a hlawk zawk tih kan India ram ngeiah pawh hmuhchhuah a ni chho ta zel a. Hetiang a nih chuan, tlangramah pawh mumal taka terrace siamin sustainable zawkin buh a chin theih tih a lang chiang ta viau mai. Ruah van tla chauh ring pawhin, buh thar rang leh thlai dang chin chhawkin hmun zîm tê pawh tangkai takin a hman daihzai theih tih a chiang chho ta a. Kum reilotê-ah Integrated & Sustainable system hmanga tlangram terrace-a buh leh thlai dang chin kual hi Research tih ngei ka tum ruh hle. A ngaihtuah peih tak tak leh âtchilh ngam tân chuan thil remchâng tam tak a awm tawh a. National paper-a hmanni lawka rawn lang khan min tiphur ang reng a. Chu chu – Research Institute lamin lei al (saline soil) pawh ngam tura buh chi an siam kha, loneitute an chintir a. Mahsela, beisei ang hê hû khan a hlawhtling ta lova. Chutih laiin, chulai rama farmer naran khan, pi leh pu atanga an lo chin chhel tawh buh chi kal zel kha a hlawhtlinpui viau lawi a! Mizoramah pawh hian, pi leh pu atanga kan lo chin chhel tawh, kan buh chite hmang leh kan rama resourse awmsate hmang hian hlawk takin buh a chin theih tih hi Mizoramah kawngpui tha leh tlo kan nei thei tih nen hian ka pawm dan thuhmun reng a ni!
3. Ramdang leh State dang atanga thlai chi lakluh leh chin uar hi kan sawrkar leh a hnathawktute hahawlhzawng tak a ni reng a. Kan neihsate hlutna hriatchhuah tum lamah chuan, kan politician leh dept mithiamte êk uih dan hi thuhmun reng an ni. Hetiang tur a ni lo. Kan rama kan neihsate hi Pathian min pêk an ni a, hêngho vawrhlar leh tihchangtlun hi kan mawhphurhna, kan hmakhaw hriltu tur leh khawvel hriata kan ram pho lang mawitu tur zawk a ni. Zobalhla ai chuan vaiho balhla kual lian pui pui kan ngaisâng zawk a. A thatna chen chu a awm reng. Mahsela, natna leh eichhetu rannung laka balhla kualho nêpzia chu sawifiah leh chuan pawh a ngai lo zawk! Zobalhla chuan natna leh eichhetu rannung chauh ni lovin, hnim pawh a ngam asin! Tunlai thiamna sâng hmangin a nutrition content hi zirchian ni ta se, vai balhla kual ai chuan zobalhla ngeiah nutrition a tha zawk dawn tih hi a chiang reng. Zobalhla atanga beverage changkang tak leh chips tui tak siam chhuah hi Mizote mawhphurhna tura Pathian min pêk zawk a ni, mi chin ang variety dang lo buaipui chiam chiam lo hian!
4. Kan leilung thleng hian kan ram leilung hi a dang a, a diverse viau bawk. Kan leilung a zira thlai chin tur thlan thiam kawngah hmasawnna tur kan ngah hle. Hemi kawngah hian kan sawrkar leh dept-te rinrawla neih tlâk an la ni chiah lo deuhin a lang a. Farmer-te kan tan tâk/hle a ngai thung. PhD degree hmuh nân ringawt ni lo, kan ram leh hnam dam nân, farmer-te hian kan hnathawh thinte hi Research level-a kan kalpui thiam a tul hle a. Chutiang farmer ni thei tur chuan, tlêma vengva deuh farmer, sûl su ngam, mi tih ang apiang uar ve ngawt ngai lo mi kan mamawh. Farming hi a nawmna pawh tawh tak takte chuan, taksa leh rilru kan hrisel phah a, kan hlim phah a. Mizoramah hian sum ngah hi hlimna emaw ti tlat, chutiang tura pawisak nei mang lote engthawl leh zahawm taka an lêng huai huai a nih vaih chuan, a hnam ang pawhin kan boral thuak tihna a ni ang. Tin, thalai leh naupang chauh ni lovin, hna tangkai thawh hi, kum upa lamte tân pawh hriselna leh dam reina a ni tlat a! Hnathawh hi anchhia a ni lova, malsawmna zawk a ni! Sum leh pai ringawt hi mihring dam chhan a ni love!