Chhiah cheng vaibelchhe 701 hmu tawh

Pawisa kum (financial year) kal mekah Mizoram sorkarin chhiah chi hrang hrang a\angin sum cheng vaibelchhe 701.1 (Rs 7,01,12,85,001) a hmu tawh.
Chhiah chi hrang hrangah sum hmuh tam berna chu tuialhthei cess a ni a, hetah hian Rs 53,84,62,002 hmuh a ni tawh.
Pawisa kum kal lai hi April atanga intan kha a ni a, April atanga September thleng, thla ruk chhungin GST-ah Rs 4,91,69,51,757 hmuh a ni tawh. GST hi tuialhthei chhiah tih lohva sum hmuh tamna a ni a, a dawt lehtu chu sales tax niin, thla ruk chhungin Rs 1,49,01,31,147 hmuh a ni tawh.
Profession tax Rs 6,56,07,331 hmuh a ni tawh a, chhiah chi dang (others) atangin Rs 1,32,764 hmuh a ni tawh bawk.
Sum hmuh tam berna, tuialhthei atanga chhiah lak hi 2024 September-ah tan a ni a, petrol leh diesel man hi litre-ah Rs 4 ve vea tihsan niin, Rs 2 chu road maintenance cess a ni a, Rs 2 dang chu social infrastructure & services cess a ni. Road maintenance cess hi Rs 26,92,31,001 hmuh a ni tawh a, social infrastructure & services cess Rs 26,92,31,001 bawk hmuh a ni tawh. Pawisa kum kal laiah Mizoram sorkarin chhiah atanga sum a hmuh tam berna a ni mek.
Chhiah atanga sum hmuh hi thla ruk chhungin a pung lo a, sum hmuh tam ber thla chu a thla khatna April kha niin, June thlengin a tlahniam a, July-ah a pung leh. Mahse July-a sum hmuh hian April-a sum hmuh a zat chuang lo. Chumi hnu August leh September-ah a thla zawnin a tlahniam leh bawk.
Thla ruk chhunga sum hmuh zat
Thla Sum hmuh
April-ah Rs 2,09,30,61,057
May-ah Rs 92,51,49,119
June-ah Rs 79,93,01,696
July-ah Rs 1,56,18,76,922
August-ah Rs 85,36,65,211
September-ah Rs 77,82,30,994
Total Rs 7,01,12,85,001