Private hospital-in biakrem pui turin sawrkar thlir reng

Mizoram Universal Health Care Scheme zawm turin sawrkarin a biakrem pui thuai beiseiin an thlir reng tih private hospital-te chuan an sawi a. He scheme zawmtu zingah private hospital pan lo thei loten an chhawr nghal theih dan dap pui turin an ngen tih an sawi bawk.
Non Government Hospital Association of Mizoram (NGHAM) thuchhuak chuan, Health minister-in tunhnaia MUHCS zawm tura a sawm bik nia a sawi hospital pathum – Ebenezer Medical Center, Trinity Hospital leh LRM Hospital bakah hospital dang la zawm lo tlemte chauh an awm tawh a. Aizawl Hospital, Greenwood Hospital, Adventist Hospital (kohhran hospital), Rosewood Hospital (Psychiatry Hospital), City Hospital leh Agape Multispeciality Hospital an ni tih a sawi.
Heng hospital hian MUHCS zawm turin sawrkar bia in an hriattir tawh a, thil tul leh pawimawh thehluh ngai thehlutin sawrkar lam an ngaichang reng tawh zawk tih sawiin, ‘MUHCS hi NGHAM member hospital thenkhat chauhin kan zawm a nih chuan, a zawm ve lo hospital tan tlakchhiatna a thlen theih dawn avangin Mizo takin pheikhai rual taka kal a thain kan hria a, kan zavaia kan zawm theihna tura inbiakrem thuai hi kan beiseiin kan thlir reng a ni,’ a ti.
Hospital hrang hrang chu an hospital dinhmun leh grade a inan loh avangin rate pawh a inang vek thei lo tih an hria tih NGHAM hian a sawi a. An hospital grading pek ang zela awm chungin, tuna an dinhmun sa aia an chhiat lohna tur tal rate pe turin an beisei tih a sawi. ‘Chutiang chu hospital inrelbawlna atan a pawimawh avangin John Williams Hospital Lunglei pawhin Synod Hospital Durtlang rate tho an hmang mek a ni,’ a ti.
Private hospital dintute chu ‘entreprenuer’ niin, risk sang tak laa medical lama ramin hma a sawn vena atan an theih anga hma la thin an ni tih a sawi a. Mizorama entrepreneur zingah thalaite tan hna siam tam ber zing ami pawh nia an inhriat thu sawiin, ‘Hna siam piahlamah damlote phai lama refer ngai a tlem zel theihnan leh ramdang atang pawha pan tlak hospital nih tumin hma kan la a. Entreprenuer hma ngai em em, kan nu leh paa kan ngaih, sawrkar pawhin kan tan a tha turin min ngaihtuah sak zel ang tih kan ringin kan beisei tlat a ni,’ a ti.
MUHCS an zawm fel theih hma pawh hian damlo mangang tak tak, sawrkar hnathawk leh MUHCS-a in-register si, loh theih loha an hospital-a awmten cashless-a an inenkawl theih hma pawhin an harsatna zualpui phuhrukna atan MR bill tal phalsak mai se tia ngenin NGHAM chuan, ‘MUHCS hi mipui zawng zawngin awlsam takin kan chhawr nghal thei dawn a, sawrkar pawh kan finchhuah a ni,’ a ti.