SUSTAINABLE, INTEGRATED FARMING IN MIZORAM – 42

RK Dawla
Mb 9366095658

1. October thla laihawl a ni a. Tlai ni tla tur a êng mawiin zan boruak a thiang tan ta hle. Pathian thilsiam mawina leh ropuina hmuhnawm hun lai a intan mêk a. Siamtu hi a lo themthiam khawp a, Mizoram a siam danglam bik dante hi a ngaihnawmin a hlu a. Khawvel hnam tam tam tak, mahni ram tia sawi tur nei lo an awm lai leh, an ram nia an ngaihte pawh hnamdangin an chuhpui vanga ralti rêng rênga hun hmang an tam tehreng nên..Chu mai a la ni lo, Chanchin tha hmangin keni daikil kâra hnam tih tham loh kha min zawng chhuak a, khawvel êng hmu pha leh khawvel than ruala thang ve zel turin bul min tansak cheu bawk. Hetiang ram rem lo awih tlan tamna, ruahtui tam vanga lei chunglâng hâng chhah hlei thei lo ni si, thlai engpawh a tha thei zel tlat maite hi Chunglam Malsawmna mak tak zawng a lo ni! Kan ât lai khan, chhim lama Lai leh Mara te, Hmar lama Hmar leh hnam tenau dangte kha, inlâkhran leh chi bing zawnga kal kan ching a. Tunah chuan kan lo harh tan ta a, Mizotawng kan tih pawh hi chi hrang hrang a awm a, Duhlian tawng erawh a thiam kan tam ber tih hrethiam pha thangthar kan tam ta! State dang leh Ramdanga kan unau ralti-te pawh, Zofate Jerusalem (Mizoram)-ah lo chuan haw-na tur nei tlatin an inhre hek lo! A hnam ang zawng te, a leilung ang zawngte pawhin, danglam bik takin Pathianin min siamin min enkawl tih hi meng ve îk tân chuan hai rual a ni love!
2. Tunhnaiah India ramchhung leh ram pawn hmun hrang hrang atangin tlawhtu kan nei uar chho mêk a. Hnam dangte khawvel leh Zoram khawvel innawmhleihzia hahîpin an sawi mêk hi! Kawng tinrênga entawntlâk chu kan ni hauh lo, mahsela kan danglamna tha bik min rawn hmuhsaktute chuan min fak bâng lo a nih hi. Damdawi leh ruihtheih thil tawlh leh zuar thin te, chutiang hmanga inawmtlei thinte lo awm ve bawk mah se, a hnam anga khaikhawm chuan – hmabâk êng tak nei hnam ropui kan ni. Politics thli chhia-in rei tak min chhêm kawi sàwi mah se, tunah chuan thil awmzia hrethiam mihring kan lo tam ta a. MLA hming tha vak lo, che chukchu deuh tân chuan Zofate awm tamnaah chuan tlin nawn a harzia hrechiangtute chu tuna kan politiciante hi an ni ngei ang. Chutiang chu a ni, kan duhtui sâwt a, DIKNA ngainatna hi kan hnam lairilah a bet tlat a. Natna chi hrang hrangin chu lairil chu hliah thin mah se, a tawpah chuan Mizo sentiments bawk hi kan hnam chuan a ngaina leh tho zel mai.
3. Kawng lehlamah chuan, a hnam anga kan that a, kan zaidam êm avang te, Siamtu Pathian kan tih êm avang te hian, kut tling lova hausa leh vantlang tâna hnawksakte hi an la inthlahrung lo mai mai zawk a. Kan tunlai thalaite pawh hian, ngaihsan tur dik an thlang thiam chho mêk a. Politician leh Sawrkar hnathawk khawsa ho deuh laka kan thîkthu chhiat sâwtziate hi hmasawnna tha-mi kan ti lo thei lovang. Pathian hian ro rel a thiam a, misualte pawh hrem chunga khêk dan a thiam a, nun dik lova tâl a, mipui thau sâwk thinte pawh tei têt dan a thiam êm êm. Kan ram leh hnam hmangaih lova, mahni pumpui hmakhua chauh ngaihtuah thin nia kan hriatte chu, anmahni zah lova an nihna chauh zahsak kan thiam chho zel mai. Chuvang chuan, kan ZORAM hi a nuam a ni! Hei lo ram dang kan nei lova, kan nei ngai hek lovang. Kan ram leh hnam zah-pah lotute hian rei an daih lovang a, kan hnam erawh a awm reng ang – Pathian lokal leh thlengin. A bik taka kan hnam min din a, a bik taka he ram min pe a, vawiin ni thlenga min enkawltu hian min thlahthlam hauh lovang tih chiang ila, ni tinin Zoram tha zawk siam turin tawngtaina nen hna thawk zel ila, kan ram hi a la ropui êm êm ang.
4. Heti taka Pathianin kan ram kan hnam min enkawl bikzia hrechiangtute chuan, kan rama Pathianin a dahsate hi a hlutzia hriatchhuah belh zel kan tum thin a. Mi ram thil chaw-lût nghek nghek lova, kan neihsate hmanga intodelh dan han zawn tak tak chuan, kan ram hi a lo hausa khawp mai. Tuialhthei leh Lungalhthei êkchhia hmanga leitha siamte hman rengna turin Pathianin ram min pe lo tih hi kei ka chiang khawp mai. Tlangram buhpawl leh fafu bâkah kan fur/favang hnimte uptawihin leitha kan siam a. Thlai tinrengah a lo tha êm êm a. Factory ropui tak taka an leitha siamte chu reilotê atân an tha a, kan rama awmsate hmanga kan siam erawh a daihreiin khuareiah a ngaihtuahawm loh telh telh a. Dose a hniam telh telh zawk a! Hlawk hluai ni lovin tlo-na leh nghehna hi kan ram tâna kan formula bulpui ber tur a ni. Hei hi central sawrkar pawhin hria-in, tunah chuan Natural Farming a kalpui mup mup mêk a. Mahsela, an formula tam zawkte hi Phai-vaiho mil deuh tura duan an ni hlawm a, kan ram hmun tina siam leh hman mai theih an ni lo deuh. Kan rama kan neihsa thil tinrêng leh kan sik leh sa leh leilung mila chêt kan lâk thiam ve tak tak hun a nghahhlelhawm hle mai…