West Bank-ah Israeli-ten European palaite an bei

West Bank luahtu Israeli hmai tuamten European palai rualte an bei.
Belgium chuan an consul general leh an palai dangte beihna chu demin Israel chu a titute hrem ngei turin an ti.
Israel Defense Forces (IDF) pawhin an dem thu sawiin ‘tharum thawhna pawi tak’ tia sawiin an chhui zui mek tih an sawi.
Prime Minister Benjamin Netanyahu-a pisa erawh chuan rinhlelh la neiin ‘Israel tihhmingchhiat tumna’ tih lam hawiin a sawi thung.
Inrinnia European palaite beih an nih hma ni chiah khan West Bank-ah tho hian khaw dang luahtuten Palestinian-te leh Washington Post photographer, Heidi Levine te chu an lo bei tawh bawk.
Inrinnia beihte hi Belgium, France, Poland leh Catholic Church aiawhte niin Kristian khua, Ramallah bula Taybeh khuaah a ni.
Israeli chengten kum khat chhung ni tin deuhthaw Palestinian chengte olive chin an tihbuai fo a hmuna en fiah tura kal an ni.
Video-ah chuan hmai tuamten an lo tibuai a, sawi dan thenkhatah chuan lungin an vawm bawk.
Belgian thuneitute chuan an consulate car darthlalang a chhia a, French mayor kutthlak niin an sawi a. Video-ah chuan French tricolor sash inbel mipa chu lirthei chhungah kutthlak a ni bawk.
Belgian Foreign Minister Maxime Prevot chuan a dem thu a sawi a, “Palestinian-te hian ni tin tharum thawhna an tuar a. Israeli chengte hian chanchinbu mite pawh an bei thin,” a ti.
“Luah theihna an neih angin Israeli thuneitute hian Palestinian-te, palai leh chanchinbu mite himna hi an ngaihtuah tur a ni,” a ti.
Israeli Foreign Minister Gideon Sa’ar-a pawhin thil thleng a dem thu a sawi a. Foreign ministry chuan a tuartu ambassador-te a biak thu a sawi.
IDF chuan Taybeh-a ram dang palaite beihnaah hian an sipai an inrawlh lo nia an hriat thu a sawi.
Netanyahu-a pisa erawh chuan ‘thil a chian hma chuan thutlukna siam’ a tum lo tih a sawi a. Social media-a thil langte chuan ‘thil nihna tak tak kimchangin a tilang lo’ niin a sawi.