Aizawl FC in MPL Semi-final an khel dawn lo

On Oct 19, 2026 0 0

October 16, Inrinni khan Mizoram Premier League (MPL) season 13-na League round khelh zawh a ni a, point li a sang fal chungin Aizawl FC an champion. League round a champion Aizawl FC hian semi-final an khel dawn lova, AFC hmunruak hi pangaa awm Ramthar Veng FC in an luahkhat dawn. MPL Semi-final khel lo tur Aizawl FC chungchang hi Mizoram Football Association (MFA) chuan vawiin hian Executive Committee-ah an ngaihtuah zui dawn.
Inkhel hnuhnung
MPL 13 a khel tha tluang tak, table chung ber luah ngar ngartu Aizawl FC hian League round-a an match hnuhnung berah Kanan FC an hmachhawn a, 5-1 ngawtin an hneh.
Champions chiang tawh chunga inlan Aizawl FC hian harhchhuak tlai hret Kanan FC lakah bul an tan tha a, Zomuansanga chuan minute 27-naah hmahruaina goal a thun. Kanan FC lakah khel tha zui viau mah se AFC hian chawlhlawk hmain goal an thun belh thei bik lo.
Chawlhlawk hnu lamah inkhel a hmuhnawm leh zual a, goal 5 ngawt a luh belh. Aizawl FC hmahruaina goal thuntu Zomuana chuan minute 48-na lekah an goal hnihna thunin, an hmahruaina a tizau. Zomuana goal thun hnu hian bench atanga lut H Lalruatfela chuan minute 52-naah an goal thumna a thun belh zui leh a, an khingpuite nen an inkar a zau leh zual.
Si thum ngawt an phurh hnuin Kanan FC tan Malsawmzela chuan minute 59-naah goal thunin an si phurh a sut then. Valpuia goal thun vangin Kan FC phur thar bawk mah se Aizawl FC tan Stephen Lalrinfela leh T Malsawmzuala ten goal an thun belh zui leh a, champion chiang tawh Aizawl FC hian Chanmari FC nen an inkar tizau leh zual turin hnehna an chang a, point 4 a sang fal chungin an champion zui ta a ni.
An dinhmun hnuhnung
Inrinni a inkhel dangah pahnihna luah chiang tawh Chanmari FC in him hram tuma tan khawh MLS FC an hmachhawn a, 6-1 ngawtin hnehna an chang ve bawk.
MPL 13 League round khelh zawh takah khelh 14 atanga point 35 hmuin Aizawl FC an champion a. Chanmari FC, Mizoram Police FC leh Dinthar FC ten top 4 huang an luah a, semi-final khel turin an tling.
An match hnuhnung berah Chanmari FC laka mualpho MLS FC chuan khelh 14 atangin point 11 an hmu a, table hnuai ber an luah. MLS FC hi MPL atangin an tlahniam a, boruak thar a awm a nih loh chuan season khat tal chu Mizoram tualchhung league sang ber MPL an hmachhawn dawn lo.
Boruak tha lovin a chenchilh reng Kanan FC inkhelh 14 atanga point 12 hnuin pa 7-na an luah ve thung a, MPL Khel tur zawnna play-off an hmachhawn thei dawn. Play-off paltlanga MPL an hmachhawn zui leh a nih chuan boruak thar nen bul an tan thei ang a, sang zawkah an invawrh theih ngei a beiseiawm.
Semi-final inlan lo tur Aizawl FC
MPL 13 – League round a champion Aizawl FC chuan semi-final an hmachhawn thei dawn loh thu MPL Board / MFA hnenah ziakin an thlen a, MPL Board pawhin Aizawl FC thu thlen an ngaihtuah zui nghalin Aizawl FC aiawh tur an tichiang zui nghal bawk.
Aizawl FC in MPL Board-a lehkha an thehluhah MPL 13 chu Ocotber ni 16-20 chhunga khelh zawh tura ruahman lawk a nih thu leh chumi mila inbuatsaih an nih thu an tarlang a. MPL 13 pawhsei a nih dawn pawhin ruahman lawk anga kal tlangpui tura an ngen thu bakah October ni 20 hnu lamah MPL khel tawh lo tura an inngaih vangin ruahmanna dang an lo neih tawh thu an tarlang tel bawk. October ni 20 thleng MPL khel tura an inbuatsaih laiin MPL final hi October ni 30-ah khelh tura ruahman a nih leh tak si vangin inelna an hmachhawn zui zel thei dawn tak loh thu leh MPL an ngaihhlut thu an tarlang tel bawk.
MPL Board lam pawhin Aizawl FC hnen atanga lehkha an hmuh chungchang hi October ni 17 – Inrinni tlai khan an ngaihtuah zui nghal a. Aizawl FC in semi-final an hmachhawn zui dawn tak loh vangin an League round-ah pa 5-na Ramthar Veng FC chu semi-final khel tur an nih thu thuchhuah an siam zui nghal. MPL an hmachhawn hmasak berah Ramthar Veng FC in semi-final an hmachhawn nghal dawn a, an tan chuan bul tanna tha tak a ni ngei ang.
Aizawl FC chungchang hi Mizoram Football Association (MFA) chuan vawiin a Executive Committee Meeting-ah Aizawfl FC in semi-final an hmachhawn loh tur chungchang hi an ngaihtuah zui nghal dawn.