Inchai tur inchai chakte an inpeih

October ni 28-30, 2026 chhung hian LPS Arena, Falkland-ah Mizo Inchai Title Fight 2026 neih a ni dawn a, kawnghren chuh turin inchai chakte an inpeih. Inchai chakte hi Inrinni khan LPS Auditorium-ah an inbuk a, mipui hmuh turin inhmachhawnna hmasa an nei nghal.
A tlanchhe lo a nih chuan ka chawi ang
– Sangliana
Mizo ten mimal infiamna kan ngaihhlut ber chu Palian inchai a ni a tih ngam. Mizote hi michak leh huaisen ngaisan hnam kan ni a. Palian inchai en turin Lammuala leng lo mipui an lo pungkhawm tawh thin. Hmuhnawm dang tam tawh mah se Palian inchai chu Mizo mipui ngaihven hlawh leh en chak a la ni reng a. Palian champion chu Mizo champion a pawm a la ni reng bawk. Mizo Inchai title fight 2026 a Palian kawnghren inchuh tur Lalsangliana leh Lalremtluanga Chhangte (Bawihpuia) te pawhin ngaihven an hlawh hle.
Kum 2014 atanga palian champion ni tan Lalsangliana chuan a kawnghren humhim turin amah chotu Bawihpuia a hmachhawn dawn. Champion lai Sangliana chuan kawnghren chuha a khingpuite hmasa te a chawi thin chu a khingpui ten mualphothlak an ti a. A hnua mite chawi hlauva an tlanchhiat zel thu a sawi. Khuangchawi thla ni 30 zana a khingpui tur Bawihpuia pawh chawi ngei a tum dawn a, ‘a tlanchhe lo a nih chuan ka chawi ngei ang’ a ti.
Sangliana thusawi hi Bawihpuia chuan chhangletin, “Sangliana hmaah ka tlanchhe lo dawn hauh lova, amah hi ka bawhbet ang a, ka chawi zawk ang,” a ti.
Sangliana leh Bawihpuia inchai hi a nep dawn hauh lova, a hmuhnawm hle dawn. Pian tha, chak, nunchang tha leh taima Sangliana hian kum 2014 khan Lalnunfela hnehin Palian Kawnghren a hreng tan a. Amah chotu PB Lalnienga, Lalnunfela leh Lalrinchhana Sailo te hneh zui lehin kum 11 chuang zet a palian huangah a vawk lal len tawh. Bawihpuia a hneh a nih chuan palian a champion ber R Vanlalduata record a hnaih hle tawh dawn. Sangliana hian chawlh mai a la tum lova, Vanlalduata record khum ngei a tum ang.
Upper Republic tlangval, Excise & Narcotics Department-a thawk mek Lalsangliana hi Mizo inchaia Palian champion a ni mai lova, Mizo inbuana palian champion Vaninmawia hnehin champion lai a ni mek bawk. Hei bakah hian Tahan-ah a han champion tawh bawk a. Zoram khawvela champion a ni. A pian a thain a chak em em a, Sangliana hneh tur meuh chuan a khingpuiten rin an kai zo lo fo thin.
Bawihpuia erawh hi amah aia kum 8 zeta upa Sangliana a hlau lova, hneh ngei turah a inngai. Bawihpuia hi 6.1ft a sang a ni a, kg 117 a rit a ni. A sangin a lian satliah ngawt lova a chak tel. A palen vanga Palian Inchai hmachhawn tura inbuatsaih chawp a ni lova, wrestling-ah tawnhriat tha tak a nei. National Games-a Wrestling a inelnaah Mizo tan tlin (direct qualify) a har a, National Games hmachhawn tawhte pawh Wild Card hmanga hmachhawn an ni chawk. Bawihpuia erawh hi chu Wild Card hman ngai lova tling niin National Games a lo hmachhawn tawh a, North East Games-ah Bronz Medal a lo la tawh bawk. A tawnhriat hrang hrangte leh an inbuatsaihna zawng zawngte hi Sangliana hneh turin a tawk hleah a ngai.
Kawnghren kalsan tur Eli
Nulaihawl champion Elizabeth Rohlupuii chuan a kawnghren humhim turin Ruthi Lalhruaitluangi, Kolasib a hmachhawn dawn. Eli-i hian a kawnghren a humhim a nih pawhin a kawnghren kalsanin Nulian huangah kawnghren chuh a tum thu a sawi. Nulian huangah a insawn a nih chuan Mizo inchaia nulian inelna boruak a nung thar hluai ang.
Elizabeth Rohlupuii hi Mizoten Wrestler kan neih that ber zinga mi a ni a, National huapah medal pa 4 la tawhin, State championship-ah phei chuan medal 15 chuang zet a la tling tawh. October ni 28 zana a kawnghren chuhpuitu Rutthi hneh ngei turin a inngai a, a kawnghren humhim thei turin a inbruatsaih tha viau bawk.
Eli hi nulian huangah a insawn dawn a, nulian champion Lalhmangaihsani, Sangsangi kawnghren chuhpui Zodinpuite leh nulian wrestler tha tak tak an awm sa bawk. Eli-i a tel belh dawn bawk nen nulian kawnghren chuh tur zawnna atangin boruak lian tak a awm sa ang a. Kum 2028 nulian kawnghren inchuhna boruak a sang chho thei viau dawn bawk.
Ka chak chiang tawh ang – Sangsangi
October ni 30 zana nulian kawnghren inchuh tur champion lai Lalhmangaihsangi (Sangsangi) leh Zodinpuii te 2024 khan kawnghren inchuhin an lo inhmchhawn tawh a, an inhnehtawk hle. Round nga an inchai chhungin chak zawk an awm thei lova, inbanphawiah Sangsangi vannei hramin a kawnghren a humhim. 2024-ah vanneithlak taka chak Sangsangi chuan, “tun tum chu a danglam tawh dawn, ka chak chiang tawh ngawt ang’” a ti.
Sangsangi chuan, “2024-ah khan dam chian loh vangin inbuatsaihna ka nei tha tawk lo. Tun tumah erawh ka inbutsaih tha viau a, sawizui tur awm hlek lova chiangin chak ka tum,” a ti bawk.
Kum 2024 a Sangsangi nen kawnghren an inchuh tum khan Zodinpuii hian Sangsangi lakah point 1 in hma a hruai. Point hmuh belh ngei tura inngaiin complaint an nei. A complaint hlawhtling se point 2 a hmahruaiin champion tur a ni a, an hlawhtlin loh vangin pont 1 paihsak an ni thung. Point paih a nih vangin a khingpui nen an point hmuh a inzat ta chiah a, round 5 chhungin chak zawk an awm loh phah. Uiawm taka champion zo ta lo Zodinpuii chuan tihsual awm lo, chiang taka a chak tawh ngei tur thu a sawi.
‘Sangsangi ai hian ka fitness a tha zawk a, chu chu ka chakpui ang,” tiin Lunglei nula Zodinpuii’n Leitlagpui lamah kawnghren hawn tawh ngei a inbeisei hle.
Mizo Inchai Title fight 2026-ah hian kawnghren inchuhna paruk a awm dawn. Palaihawl champion Remruatpuia leh amah chotu Ramropuia te inhmachhawn tur hi a hmuhnawm hle ngei dawn a. Anni hi October ni 29, Ningani zanah an inhmachhawn dawn.
Pate huanga champion lai Lalchhanhima’an a kawnghren a kalsan chu Saitual inchai chak pahnih B Lalawmpuia leh Jony Lallawmkima ten an inchuh dawn. Anni pahnih inhmachhawn tur hi kawnghren inchuh inchai hmuhnawm ber tura ngaitu an thahnem. Anni bakah hian Lalvenhimi, Nute champion lai leh Lalrinfeli ten Nute kawnghren an inchuh dawn bawk.
Mizo Inchai Title Fight 2026 hi Pu V Malsawmtluanga, MLA – Lunglei HPC Vice Chairman in a kickoff dawn a. Zanhnihnaah Pu Lalthlansanga, Minister in a hmanpui ang a. Palian inchai zanah Chief Minister Pu Lalduhoma khuallian niin Palian champion kawnghren a hrentir ang a. Pu Jeje Lalpeklhlua, MLA in Nulian champion kawnghren a hrentir dawn bawk.
Mizo Inchai Title Fight 2026 ah hian Mizoram chhim leh hmar, chhak leh thlang atangin Inchai chak an fuankhawm dawn. Chhim khawpui Lunglei atangin inchai chak pathum; Lalremtluanga Chhangte (Palian challenger), Zodinpui (Nulian Challenger) leh C Lalrinfeli (Nute challenger) te an tel a, Kolasib atangin Rutthi Lalhruaitluangi (Nulaihawl Challeger) a inlan ang a. Khawchhak lam atangin Saichal nula, Aizawl Zemabawk West a khawsa Lalhmangaihsangi (Nulian champion), Saitual khawpui atangin B Lalawmpuia leh Jony Lallawmkima (pate challeger) te inlan in, khawthlang khawpui Mamit atangin Ramropuia (Palaihawl challenger) a inlan dawn bawk.
Aizawl khawpawn atanga inchai chakten inchai tura Zofate Jerusalem Aizawl an pan khawm rual hian Aizawl atangin Lalsanglianga, Upper Republic (Palian champion), Remruatpuia, Bethlehem Vengthlang (Palaihawl champion), Lalvenhimi, Bethlehem (Nute champion) leh Elizabeth Rohlupuii, Bawngkawn West / Melriat (Nulaihawl champion) te an inlan dawn bawk.
Mizo Inchai Title Fight 2026 hian a huamzau a, a boruak pawh a lian hle tura ngaih a ni.