Ranvulh vaccine pek runpui hawng

Animal Husbandry & Veterinary Department chuan nimin khan Classical Swine Fever (CSF) Vaccine pek runpui vawi 4-na chu video conferencing kaltlangin an hawng a, Directorate, Aizawl-a officer-te bakah district hrang hranga thawktute nen hun an hmang ho a ni.
Vaccine pek runpui hi Livestock Health & Disease Control Programme (LHDCP) – National Animal Disease Control Programme (NADCP) hnuaia neih a ni a, he scheme atan hian DAHD, Govt. of India-in 100% a tumsak a ni.
Classical Swine Fever hi vawk hri hlauhawm tak, a vei tawhte chu 80% – 100% deuhthaw thih theihna, a enkawlna damdawi mumal awm lo a ni. Invenna awmchhun chu Vaccine chauh hi a ni. Mizoramah vawk vulh hi eizawnna bulpui a nih avangin CSF hri lêng tur ven hi AH & Veterinary Department chuan a ngai pawimawh hle a ni.
AH & Veterinary Department chuan vawk vulhtu zawng zawngte chu, Veterinary Officer-te, VFA-te leh Animal Health Worker-te tawiawm tur leh an vawkten vaccine an dawn ngei theihna tura lo inring theuh turin a ngen a, Local Council leh Village Council-te tawiawmna a ngen bawk a ni. Vawk thi thut emaw natna danglam tak emaw a awm chuan rang taka Veterinary Hospital/Dispensary hnai ber a report nghal turin a ngen bawk a ni.