Zoram hmabak – zirlaite

MZP kum 90 tlin lawmna nimina hmanpuitu school education minister Dr. Mathlana chuan ‘zirlaite hi Zoram hmabak an ni’ tiin a sawi a.
Hetiang thu hi tunhma atang tawha ram hruaitute leh khawtlang hruaituten an lo sawi tawh thin a ni. He thu hi thu dik tak a ni a; mahse, a dikna hi Mizoram hian eng tiang chenin nge kan thatpui tih erawh ngaihtuah tham tak a ni awm e.
Kan hriat angin zirlai pawl hruaitute leh hruaitu ni ve lem lo te pawh, political party belin, engtin tin emaw an lawn chho a, a tawpah legislator te an rawn ni nawlh nawlh a. Hetiang hi a nih avang hian, zirlai pawl hruaitu nih hi manhla tak, political career kailawn pawimawh tak anga ngaihna te pawh a awm thei awm e. Hei hi a tha lo e, a dik lo e, kan tihna ni lovin, hetiang chauh hi zirlaite hian ‘Zoram hmabak’ nihna emaw, ‘Zoram hmabak tihhlawhtlinna’ emaw kan ti palh ang tih a hlauhawm a. Ram siam that duh tak takna thinlung pu chunga politics-a kan zuang lut a nih chuan, chu tluk chu a awm chuang lo ang. Mahse, lalna leh thuneihna chen ringawta kan tawp a nih chuan, ‘Zoram hmabak’ quality kan pha lo hle dawn tihna a ni. Ram leh hnam haivur lova, mahni inhaivurna ringawta kan tawp leh si a nih chuan, in leh lo tha tak din thei, nuamsa taka khawsa thei, zahawmna nei lem lo ram hruaitu pakhat nih ve-na mai chauh a ni ang. Chu chu ‘Zoram hmabak’ tihin a kawh chu a ni si lo.
Tunah phei chuan ‘Zoram hmabak’ hi a ko ber ber tawh hle. Kum tin zirlai graduate a sang rual an chhuak hum hum chung hian, tuna kan ram inrelbawlna hna pawimawh, a hotu lu nihna chelhtute hi Zo lanu leh val rual an ni lo a, hnam dangin a ram leilung fate hi min tir kat min tir kat a, mahni ram inrelbawlna hna pawimawhah thuneihna sang nei pha lovin kan phar kual nasa ve em em mek chu a nih hi!
MZP hian sawrkar khawih thil eng eng emaw an buaipui ve thin hi a thatna chin awm bawk mah se, an hna pui ber tur chu, tuna kan subject mek, ‘eng tin nge hnamdang awp behna hnuai atang hian kan tal chhuah theih ang’ tih te hi ‘mega project’ ah nei thei se a duhawm hle. Chu chu ‘Zoram hmabak’ an nihna dik tak tur chu a ni awm e.