December atangin hmarcha ro lei dawn

Kuthnathawktuten kumin December atangin Mizo hmarcha ro kg khat Rs. 350 tala an hralh theihnan sawrkarin hma lak sak dawn.Mizoram Agriculture Marketing Board (MAMB) chu an chairman, Agriculture minister PC Vanlalruata hoin Thawhtanni khan an thukhawm a. Sawrkar flagship programme – Bana Kaih Scheme hnuaia thlai thar lei leh tih ral dan tur an sawi.
Kum 2026- 2027 season atan hmarcha ro hralh leh lei hun atan kumin December atanga nakum February thleng nise, kg ah Rs.350 china lei nise, an ti. MAMB hian kum kalta khan January atanga March thla chhungin hmarcha ro lei turin a duang a, hei hi kuthnathawktute tan a tlai hret nia hria in, kuminah chuan December atanga lei sak tan theih turin ruahman a ni.
Hetihlai hian hmarcha ro hi a chingtu tam zawk chuan sawrkarin a leisak ngamna aia to hian an hralh thei hlawm thin niin thu dawn a ni a. Hei vang hian sawrkar inrawlh ngai lutuk loin tih ral a ni thin tih sawi a ni.
The Aizawl Post zawhna chhangin MAMB chairman chuan, hmarcha ro leisak hun an tih hma chhan hi, hmarcha thar/ hmin hun ngaihtuah tel bakah hunpui lai inhmakhuana atana kuthnathawktute ngaihtuah telna a ni pah tih a sawi a. Hmarcha hi a ro tha chauh an lei thei dawn tih a sawi.
MAMB thutkhawmah hian kum hnih chhunga thlai thar lei leh hralh kawnga hma an lo lak tawhna an thlirho tih a sawi a. A hlawhtlinna lai an thlir rualin, an tih fuh chiah lohna lai siamthat dan tur pawh an thlir tel tih sawiin, “Marketing-ah hma kan sawn viau tawh niin kan hria,” a ti.
MAMB ruahmanna tho hian sawhthing chu kuminah February to May chhung lei a ni a; hmunphiah leh aieng pawh February to March chhung khan lei a ni.
Sawhthing hi Tuirual Airfield hluiah transit godown an siam dawn a, Tuirial khawchhung paltlang kher ngai loin a panna kawng thar an sial dawn a, an inruahman mek tih minister PC Vanlalruata hian a sawi a. Sawhthing ro sawngbawlna tur pawh ruahman mek a ni tih a sawi bawk.