Khawlai ralmuanna leh mipui…
November ni 2 zing dar 2 vel khan Bawngkawn to |huampui Road-ah khawlaia tlangval insual buai chungchangah Bawngkawn Police chuan hma a la a, he thila inhnamhnawih mi 10 man niin, heng mite lakah hian criminal case ziahluh a ni a, an vai hian man niin, court-ah thawn an ni a. Mizoram Police chuan khawlaia insual buai ching lakah a na thei ang berin hma lak zel an tum tih an sawi a. An hma huna ei an zawn zelna atana pawi thei, police thubuai – criminal case nei lo tura insum a, inthiar fihlim dan zawng turin \halaite an chah a.
Police thuchhuahin a tarlan danin Aizawl khawpui huam chhungah police patrolling neih \hin a ni a, police patrolling party awm remchan lohna hmunah hetiang thil thleng a awm a nih chuan a ranglamin 112 ERSS emaw heng police station number – Aizawl PS – 8794747291, Bawngkawn PS – 8794747292, Vaivakawn PS – 8794747293t 6909316441, Kulikawn PS – 8794747294, Zonuam OP – 8794747295, Sialsuk PS – 6909316443t 9366884087, Sairang PS – 6909316442, Darlawn PS – 6909316446, Sakawrdai PS – 6909316445, Seling OP – 7005994956 ah information pe thin turin mipui an ngen a ni.
Mizoram tlawhtu khualzin \henkhatin social media-ah Aizawl khawpui zan lam boruak muanawmzia hahipin an sawi a; zanlaiah pawh khawlaiah hmeichhe tan hlauh tur a awm lo, a ralmuang tiin.
Hetih laia zan lama insualrawn thawm hriat tur a lo awm leh \hin hi a pawiin a veiawm ta hle a. Heng insualrawn chingte hian pawisak an nei vak lovang tih a hriat mai a. Tunhma pawhin khawlaia hetianga insualrawnna thlengah mi \hahnemngaiten \helh an tumna lamah hliam an tawrh phah a, nunna hial chan te pawh an lo awm tawh a nih kha.
Hetiang hi kan dinhmun mek a nih avang hian, Aizawl khawpui mihring nuai thum chuang awmnaah hian police patrolling pawh hi tun aia tam zawk intirh chhuah a \ul tawh niin a lang. Chutih rualin, khawtlang nena \an ho dan \ha zawk te pawh hi ruahman theih a nih a rinawm. Tuna police station hrang hrang contact te hi mipui lam pawhin ngai pawimawhin save \heuh ila. Hei bakah hian, ERSS (Emergency Response Support System) lam a lo busy viau palh thei a, police patrolling contact pawh hi mipui hriat tura tlangzarh theih ni se a \ha awm e. Hei bakah hian, khawlaiah a khat mawi tawkin heng police station hrang rang number-te hi langsar takin tarlan theih ni se a \hain a rinawm.
Khawlai ralmuanna tiderthawng thei zawnga khawsate en liam mai mai \hin kan nih chuan, khawlai ralmuanna tiderthawngtu zingah kan tel ve tho tihna a ni. Khawlai ralmuanna vawng him tur hian mipui hian mawhphurhna kan inpek thiam a pawimawh hle a ni.