Tour operator-ten inzawmna chhu chat

Tour operator-ten
inzawmna chhu chat
Mizoram-a tour operator intelkhawm chuan an member thin Surita Chakma leh a agency MuroMuri chu member a nihna atangin an paih tih an sawi bakah Mizoram Tourism department chu tour operation license a neih cancel sak turin an ngen tih an sawi.
Association of Tour Operators Mizoram (ATOM) thuchhuak chuan, tunhnaia Surita Chakma-in thu belhchian dawl lo hmanga vantlang hmuha Mizo hnam demna, deusawhna leh boruak chawkbuai thei zawng thu a sawi chu an dem tih a sawi a. Mizoram tourism sector aiawhtu pawl an nih angin, hnamzia humhalh, inzahtawn leh hnam inkar boruak muanawm vawnhim chu an ngaihpawimawh ber zing ami a ni tih a sawi.
‘Kan member-te hi kan ram aiawhtu pawimawh tak an nih avangin, kan hnamzia leh rohlu hmuhsitna, Mizo hnam deuhsawhna emaw kan ram mipui inlaichinna tichhe thei zawnga vantlang hmuha thiltih emaw sawi emaw reng reng hi kan hnamzia leh vantlang inkaihhruaina nen inkalh tlat a ni. Hetiang taka Mizo hming tih bawrhban leh tih hminghliau hi ATOM chuan thutlukna khauh tak a siam a. Kan Memorandum of Association (MoA) clause 4/B/a/v in thuneihna min siamsak angin, Surita Chakma leh a agency MuroMuri chu ATOM member an nihna atangin paih leh tihtawp a ni a. Hemi rual hian, ATOM chuan Surita Chakma leh a agency MuroMuri nena inzawmna leh thawhhohna zawng zawng kan chhuchat hlen a ni,’ a ti.
Tourism leh hospitality industry lama an thawhpui, regional affiliates leh stakeholders dang hnenah hriattirna tihchhuah nghal a ni bawk tih sawiin, hei hian an industry chhungah langtlang taka inpawhtawnna a siam bakah an thawhpuite chu khualzin leh stakeholder zawng zawng tan boruak muanawm, zahawm leh hnamzia inzahtawnna hmun buatsaih turin a pui dawn tih a sawi a. Tourism ecosystem himna leh hmasawnna humhalh zel a nih theihnan ATOM chuan Surita Chakma leh a agency MuroMuri tour operation license chu tihtawp sak turin Mizoram Tourism department hnenah ngenna a thehlut tih a sawi a ni.
‘Kan ram muanna, inpumkhatna leh hnam zahawmna tibawrhbang leh tichhe thei zawnga tourism kaihhnawiha chetna a awm a nih chuan ATOM-in a enzui reng dawn a. Mizoram tourism stakeholder zawng zawng kan hnamzia, Zo nun zemawi leh inzahtawnna vawngnung zel turin kan inngenin kan insawm a. Mizorama tourism innghahna lungphum chu muanna, inpumkhatna leh khualtha thlenna a ni a. Khualzinte tan boruak muanawm leh zahawm buatsaih a, Mizo hnam zahawmna leh rohlu theihtawpa vawnhim a, chawimawi zel a nih theihnan ATOM chuan a dinchhan hi nghet takin a hlenchhuak zel dawn,’ a ti.