Mumbai-ah Prince William-a’n e-rickshaw-in a nupui phur kual

Britain lal fapa, Prince William-a chuan Mumbai khawpuiah sik leh sa inthlak dona kawnga hma la tha chawimawina dawng tur finalist-te kawm turin a nupui, Kate Middleton-i chu electric auto-rickshaw-in a phur.
Lal fapa nupa hi India-a sumdawnna khawpui, Mumbai-ah hian Earthshot Prize hlan turin ni thum chhung an châm turin an awm mek a, chawimawina an hlan turte hi mi panga niin $ maktaduai 1.3 theuh hlan tel an ni dawn a, Thawhlehni zan khan an hlan.
Tun tuma India an tlawhah hian Prime Minister Narendra Modi-a pawh New ​Delhi-ah Nilaini hian an kawm dawn a, tun tum hi kum 2024-a cancer enkawl a nih hnua Princess of Wales-in ram pawna langsar taka a zin chhuah hmasaka ber a ni.
Thawhlehni khan William-a hian electric hmang auto-rickshaw khalhin Mumbai khawpuia Arabian Sea chunga dawh Bandra-Worli Sea Link leiah a tlan a, a hnungah Kate-i a chuang a, chawimawina dawngtu turte an kawm a ni.
An nupa hian finalist-te hi chibaiin thla pawh an la ho va, a hnuah an social media-ah an tar lang zui.
“India hi ram dang zawng aia Earthshot Prize dawngtu leh finalist ngah ram an ni,” tiin Instagram-a thlalak an dah chhuahah an ziak a. “Earthshot Prize hi khawvel huapa khuarel humhalhna leh tun din lehna tur kaihhnawih chawimawina a ni,” an ti bawk.
Kum 44 mi, Kate-i hi a cancer darh zau zel tur ven nan chemotherapy ​a la a, hei vang hian a tih tur tam tak pawh tihtlemsak a ni.
Tun hnaiah tlem tlemin vantlang hmaah a inlan tam leh tan a, heti chung hian ram pawna William-a a zinna a la zui chhuak tlem hle.
Kum 2024 hnua ram dang a tlawhna hmasa ber chu May thlaa Italy a tlawh kha niin ni hnih chhungin naupang enkawlna lam kaihhnawihah a zin a, amah chauhvin a ni nghe nghe.

Get real time updates directly on you device, subscribe now.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More