Dr B R Ambedkar Konaseema district, Andhra Pradesh-a Oil & Natural Gas Corporation (ONGC) tuialhthei khur atangin Thawhlehni khaw var hma khan boruakalhthei a put a, venthawn thilah a bul hnaia chengte thiar chhuah an ni.
Nagaram khuaa khur verh nawn lehna, Thadivari Meraka hmun atanga boruakalhthei put awm hian a bul hnai chengte a tichiai hman hle a. ONGC atang chuan thuchhuah a la awm rih lo.
Boruakalhthei put a awm tih an hriat veleh ONGC atangin mi thiam leh district thuneitute kal nghalin a put thunun a nih theih nana tul ang leh inven ngaite an buaipui nghal a. Thuneitute chuan chhiatna lian zawk a awm loh nan a chhehvela awmte chu hmun himah an thiar chhuak nghal.
“A tul anga tihtawp dan ngaihtuah turin Narsapuram atangin blowout control team tirh an ni a. Kangmei chhuak a awm palh thuta che thei turin kang thelhtute pawh a hmunah thutchilhtir an ni,” tiin thuneitu sang pakhat chuan a sawi.
Tual chhunga thuneitu pakhat chuan khur chhin phui that tak atangin verh nawn leh (re-drill) a nih laiin boruakalhthei hi a put a, thil puak ring tak a awm bawk tih a sawi a. Tual chhung mite chuan boruakalhthei put hi CNG niin an sawi a, a bul hnai khuaah rei lo te chhungin a darh nghal niin an sawi bawk.
Chhiatna thleng thei leh kangmei chhuak palh thei veng turin a chhehvelah hian water umbrella dah nghal a ni.
A bul lawka National Highway 216 helna kawng pawh lirthei tlan phal lohva tih nghal a ni a. Thuneitute chuan thil awm dan an thlithlai reng a, boruakalhthei put pawh tihtawp tumin an bei a, a bul hnaia a darh zel lohna turin hma an la mek zel tih an sawi.
Dr B R Ambedkar Konaseema district-ah tho hian January 5 khan Malikipuram-a Irusumanda khuaah boruakalhthei hi a lo put chiam tawh bawk.
Get real time updates directly on you device, subscribe now.
Prev Post