Prime minister hlui lung in tang mek, Imran Khan-a chuan Pakistan-a judge lawk ber berte hnenah amah leh a nupui, Bushra Bibi-i te rang taka enkawl an nih theihna tur a dil tih a dan hre miin lehkha a tihchhuahah tar lan a ni.
Dan hre mi, Salman Safdar-a hian Thawhtanni khan X-ah lehkha hi dah chhuakin ‘mihringin a mamawh damdawia inenkawl dilna’ tiin a sawi a. Hei hi nikuma a damloh hnua Khan-a’n hetiang ngenna lehkha a siam hmasak ber a ni.
Safdar-a hian November 11 khan Khan-a nen hian Adiala Jail an tih bawk, Central Jail Rawalpindi-ah darkar thum inkawmin lehkha hi ziak tura a tih anga ziak a ni tih a sawi.
Kum 74 mi, Khan-a hi August, 2023 atang khan lung inah a awm a, a kaihhruai Pakistan Tehreek-e-Insaf (PTI) party chuan politic avanga hrem mai niin an sawi.
A lehkhaah hian December 20, 2025-a a nupui nena thubuai hrang hrang an neih zinga pakhat avanga kum 17 tang tura an hrem hnuah pindan chep takah ‘ni khatah darkar 22 khung an ni thin’ tih a ziak.
A mit ding lam khaw hmuh theihna chu 85% a hloh tawh a, doctor-ten a thluaka harsatna tawk thei leh lungphuchawl thut thei a ni tih an hrilh bawk niin a sawi.
Khan-a hian ‘damdawi thilah zahngaihna a dil ngai lo va, damlohna chu tactic-ah a hmang ngai lo bawk’ tih ziak.
August 18 khan Supreme Court chuan Khan-a hi ni hnih chhungin Islamabad-a Shifa International Hospital-ah sawna medical board-in an ti a. “He thupek hi zawm a ni lo,” tih a ziak thung.
Hemi tum hian sorkar enkawl Pakistan Institute of Medical Sciences (PIMS)-ah kalpui zawk niin darkar rei lo te hnuah lung inah bawk letpui leh a ni.
November 10 khan a mit chiu turin damdawi inah kalpui leh a ni a. PIMS chuan ‘damdawi lam atanga enin a dinhmun a tha’ tia sawiin Parliamentary Affairs Minister Tariq Fazal Chaudhry-a pawhin a mamawh ang enkawlna a dawng tih a sawi bawk.
Khan-a hian kum 2018-a a neih, Bibi-i pawhin April atang khan a mit a sawisel a, ‘zan a ni tawh’ tih sawiin zai nawn leh loh chuan ‘a khaw hmuh theihna a hloh thei dawn’ tih a ziak.
Bibi-i hi a dan hre miten Thawhtanni khan Islamabad High Court-ah enkawlna a dawn dan pe tura ngenna thlenin damdawi in tha bika enkawl an ngensak.
Khan-a farnute pahnih, Uzma Khan leh Noreen Niazi te chu thla hnih dawn hren an nih hnuah November 12 khan chhuah an ni a. Aleema Khan-i erawh lung inah a la awm niin PTI-in a sawi.
Sorkar chuan Khan-a farnute hi PTI-in September 27-a kawng zawh an tum, an kalpui theih tak lohvah khan dan leh thupek kenkawhna buai thei ven nan hren an ni tih a sawi.
Get real time updates directly on you device, subscribe now.
Next Post