Ronaldo nuin Portugal tlawm a diriam!

Ronaldo nuin Portugal tlawm a diriam!
An ram tana khel hnem ber leh goal khung hnem ber ni bawk a fapa hun hnuhnung lam chu head coach berin a zah loa ngaih theih turin thil a kal a; kumin World Cup-ah lah an player dangte’n a fapa chu football trophy hlu ber chawi loin chawl se an ti emaw tih turin ball tha an pe tha duh loa ngaih theih turin thil a thleng zauh zauh bawk a, Cristiano Ronaldo nu Dolores Aveiro thinrim chuan tunhnai Denmark laka Portugal national team chak loh tum khan an ram team tlawm chu a ‘celebrate’ chiam niin an sawi!
Kartawp UEFA Nations League inkhel pakhatah Portugal chu an mikhual Denmark lakah 1-4 tehrengin an tlawm a, a fapain a phu anga zahna dawng loa ngaitu Portuguese pitar chuan a fapa tel lo Portugal team chu ‘chawh’ a ti a, an phu tawk result an hlawhchhuak niin a ngai hmiah!
He legendary forward hi Denmark khel tur squad-ah telh a nih tur thu puang bawk mah se squad puan hma chiahin a record-breaking international career a tawp thu social media lamah a puang chaih a, an ram chawikangtu, mite’n Portugal inkhel an ngaihven phahna ni rei tak Ronaldo tel loa an match hmasaberah an tlawm chiang ngang mai!
Ti khan, kumin September ni 24-a Wales a hmachhawn kha Portugal colours inbel chunga Ronaldo khelh tawpna a lo ni ve ta a ni.
Nations League-a Denmark an mikhualna game kha Portuguese FA chuan an ram tana thawhhlawk ber Ronaldo thlahna hun atan an hmang a, kha pawh kha Dolores Aveiro chuan sawiselin, a fapa awm loh hlana thlahna hun (tribute) buatsaihah a puh a, zahna sang zawk hlan chungin a fapa club hlui Sporting CP lamin an thlah dawn tih a sawi!
An kawmnaah Ronaldo nu Aveiro chuan Denmark laka Portugal tlawm kha lungawithlak a tih thu sawiin, “Portugal national team hian chak loh an phu. An tlawmna khan min tilawm takzet a ni.
“Ka fapa bumin, hrilhhai takin an siam a, an zah lo a ni. A team-mate ngei ngeite pawhin an zah lo,” a ti tawn tawn!
Pathianni Braga Municipal Stadium, Braga-a an result tawnbuak kha kum 105 chhunga an home ground-a Portugal tlawm chian ber tum a nih bakah tunhnai kum 12 chhunga an tlawm nat ber tum a ni nghal.
Kum 2010 daih tawha Ronaldo tel loa Cyprus laka 4-4 draw an hlawhchhuah hnu lamah tun kha an home soil-a goal li an chhuah leh vawi khatna chiah a ni bawk.
Aveiro hian Ronaldo thlahna hun pawh kha a fapa awm lai ngeia kalpui tur a nih thu sawiin, “Rawlthar a nih laia a khelhna club Sporting CP-in an chawimawi dawn tho a, anni hian an ngaihluin, an zah zawk” tiin a sawi.
Ronaldo hnawltu nia puh head coach Jorge Jesus chuan Aveiro a zah thu leh an chak loh boruaka an phu tawk lek result an hmu tia Ronaldo nu anhla pawh a hriatthiampui thu a sawi tha ve mai!
Jesus chuan, “Cristiano Ronaldo nu hi ka chhang dawn a nih chuan ka zah tak nu a ni tih hi ka sawi duh a, a sawi tur tak a sawi a ni. Nu chu nu nge nge an ni a, pumpelhna dang a awm lo. A thu leh hla pawh ka hriatthiampui thlap,” tiin dam takin a chhanglet.
Tarlan tawh thin angin, Ronaldo hian ram tan game 234-ah goal 146 a thun tling a; a record-breaking international career-ah Fifa World Cup trophy chawi zo ta lo mah se Euro 2016 title bakah Nations League title pahnih a hawn tling.

Get real time updates directly on you device, subscribe now.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More