Mafaki a awm ta lo

Mafaki a awm ta lo
Amah chauha hlapui, ‘Halleluiah Chorus’ mawi taka sa, gospel singer hriat hlawh tak, Lalfakkimi, Mafaki tia hriatlar, kum 34, chu April ni 16 tlai lam dar 5:50 vel khan Section I (Hmar Veng), Republic Veng-a amaha a chenna inah thi a hmuh a ni a, lumenpui niin, April ni 17 zingah post mortem a nih hnuin, an khua Tlangsang, Zampui, Tripura panpui a ni ta a ni.
Republic Veng YMA President Ramdinliana chuan, “Chhun lamah a chhungte hmun danga mi ten an phone thin a, phone a chhang thei lo. Tlai lamah te an phone pawhin a chhan theih chuan loh avangin a in chung a mi, a inluahna te kan Treasurer Sangpuii an phone a, ‘min lo ensak lawk mai teh phone a chhang thei si lova’ an ti a. Kan Treasurer in a in a en a, kawngka an kik a, a lo chhan theih tak loh avangin an thenawm a mi, section leader leh secretary a pun a. Kawngka an kik bur bur a, engmah a chhan loh avangin ventilation atangin an en a, a khumah, a zangthal zawngin a lo mu a. A hmui pawh a lo duk vek tawh. Tichuan, kawngkapui bul ventilation atangin kawngkapui chu an hawng thei a, an lut a, amah an va khawih chuan a lo khawng vek tawh a, damdawi in kalin awmzia a nei tawhin an hriat loh avangin police an hrilh ta a, police lo kal hma chu kan khawih che ta lo a ni,” a ti.
Mafaki hi mi kut tuar a nih a hmel loha a hriat thu sawiin, Ramdinliana chuan, “Kawngka a kalh tha a, luhna awm a awm lo a. Police in an check pawhin ring tliak emaw ban ruh tliak emaw, rinhlelhawm ang chi a awm lo e,” a ti bawk.
Mafaki hi tunhnaiah a taksa rihna te pungin,BP sang te a nei ve niin sawi a awm a, chutiang ni loah taksa lamah midang hriatpui tur khawpa insawiselna a neih awm hriat a ni lo, post mortem report hi puanzar a nih loh avangin a thih chhan hi he thu buatsaih lai hi chuan hriat a ni rih lo.
Mafaki hi Lalthanliana (L) leh Ramdinfeli te fanu niin, kum 11 vel liamta khan Baby leh Larry te nen ‘Jeremia a au asin’ tih hla music video siamin, an pathum hian ‘Chawl lo a fak che ka duh’ tih hla music video pawh an siam a, heng te hi Mizo rimawi kawvelin a hming kan hriat lar tanna niin, amah chauha ‘Halleluiah Chorus’ mawi taka a sak chuan reilote chhungin Zoram a deng chhuak nghal a ni.
Mafaki hi nimin tlai lam dar 4:30 vel khan an khua thlenpui a ni a, lumenpui tawh loin, nizan khan an vui zui ta nghal niin thu kan dawng.