A adviser-in CM a hrilh

Kar hmasa Zirtawpni khan Budget Session-ah Lengpui Airport chungchang, Indian Air Force hnena hlan chungchang an sawi a, chief minister din laiin a adviser pakhatin a tihdikna a rawn siam.
Chief minister Lalduhoma’n house leader a nihnain he resolution sawihona tlang a kawm a, 2012-ah Congress sorkarin blast pen (jet fighter thuhrukna tur) atan ram acre 32, Lengpui Airport-ah hian Indian Air Force an pe tiin a sawi a, chu chu MNF sorkarin a cancel nia sawi a nih thu sawiin, “… sawi a awm avang hian a finfiahna kan zawng a, ka la hmu thei rih lo a, tunah chuan. Sorkar hian a cancel-na kan la hmu lo a, kan han dap zel ang a, an lo la cancel lo a nih paw’n kan cancel ang kan sorkar hian,” tiin hemi chungchang hi a sawi.
Lawngtlai West bialtu C Ngunlianchunga a lo inrawlh a, Lengpui Airport chungchanga working committee dina chairman kawmna, youtube-a an enah hei hi cancel a ni tawh tih a sawi si a tiin a rawn sawi ve thung.
Chumi hnuah working committee chairman TBC Lalvenchhunga, Aizawl West I bialtu, adviser to chief minister (finance) a lo ding a, “… blast pen, airport chhunga fighter thuhrukna tur hmun hniha an lo pek kha chu MNF sorkar khan Augut 2019-ah a cancel,” a rawn ti.
“A that chu, chu chu. Thil hi hriat sual a awm a, ngaihdam ka’n dil a,” tiin chief minister-in a sawi zui a ni.
Sawihona huna a sawi laiin adviser to chief minister (finance) pawh hian blast pen atana ram pekna hi cancel a ni lo tiin a sawi ve tho a, “An cancel reng reng lo a nia, a lehkha a la awm vek a ni,” a ti.