A bika kan humhimna Pu Lalduhoma hoin central kutah an lo pe ringawt – Zoramthanga
A bika kan humhimna Pu Lalduhoma
hoin central kutah an lo pe ringawt
– Zoramthanga
Inremna avanga kan hlawh chhuah Mizoram Special Provision Article 371G chelek a ngaih hunah takah ZPM sawrkarin hmang ngam loin Pu Lalduhoma hoin central kutah an lo pe ringawt niin MNF hruaitu Zoramthanga chuan a sawi.
June 30 – Remna Ni vawi 40-na chu Mizoram hmun hrang hrangah MNF hruaituten an hmanpui a. MNF Tawi East & West Block huaihawta Thingsulthiaha hmanpuitu an party president Zoramthanga chuan remna neih theihna tura sulsutu leh thawktu zawng zawng, kohhran, NGO, political party-te leh ram mipui chungah lawmthu sawiin Remna Ni chibai a buk a. MNF leh India inremna chu inremna zawnga hlawhtling ber, hunin a finfiah tawh niin, a rei tulh tulh anga, a hlutna kan la hre zual zel dawn tih a sawi.
“MNF leh India inremnaah hian India Danpui chhunga Mizoram inhumhimna Article 371G pawimawh tak a tel a. He Article hi kan hnam pasalthate sa lu hawn, nunna leh tawrhna tam tak nena hlawh chhuah, Mizo mipui tawrhna hrang hrang nena kan hlawh chhuah a ni a; Danpuiah Mizoram state chungchanga ruahmanna bik engpawh lo inziak mah se, Mizoram state-ah hman theih a ni loang, tiin thuneihna min pe a ni,” a ti.
Inremna avanga hlawh chhuah – Mizoram Special Provision Article 371G chelek a ngaih hunah takah ZPM sawrkarin hmang ngam loin FCAA 2023 pumpui an pawm fai vek mai kha Mizorama Mizote thuneihna central kuta hlanna dik tak, Mizoram leh Mizo hnam tan thil pawi tak a ni, tiin, thangtharte tan pawh a la pawi dawn chauh tih a sawi.
“Kan hnam sipaite sa lu hawn, a bika kan humhimna neih, Pu Lalduhoma hoa central kuta an lo pe ngawt hi MNF a sawrkar leh hunah kan la let leh dawn. Article 371G humhim ngam MNF hi Mizoram humhim turin a sawrkar leh ngei a tul bawk,” MNF president hian a ti.
MNF leh India inremna chu ramdang pawhin chilthli tla zawih zawiha an en, an awh ve em em nia sawiin, thenawm ramte pawhin remna tluantling duhin he inremna ang hi neih ve tumin MNF an ko mek a, hunin a finfiah tawh he inremna tluantling ber hi humhim zel turin Mizo mipui a sawm tih a sawi a ni.