A bul ram kangin French khawpui lian Marseille a thleng tep
France khawpui lian ber pahnih, Marseille chu a bula ram kang inman kai chak takin a dai a thleng tawh.
“Marine firefighter battalion-in thelh hna hi rim takin an thawk mek,” tiin Mayor Benoît Payan chuan a sawi.
Bouches-du-Rhône prefect huam chhunga Georges-François Leclerc-a chengte chu in chhunga awm tura tih niin kang thelhtuten khawpui ‘chhan hna’ an thawk mek tih a sawi.
Kang hian khawpui hnaih hle tawh mah se thil hlauhawm tak a ni lo va, ‘thunun’ a ni tih a sawi.
Marseille Provence thlawhna tumhmun erawh Thawhlehni khan khar a ni.
Mi cheng thenkhat chu ina awm tura tih niin inkhar phui turin an ti a, kawngpuite pawh emergency services chetvelna awlsam tura zuah tura tih a ni.
Kar hmasa Thawhlehnia Marseille hmar lam Pennes-Mirabeau bula kangmei chhuak hian ram hectare 700 chuang a kang chhe tawh.
Tual chhung thuneitute chuan kawngpuia car kang atanga intan nia sawiin hemi zan atang hian thli na tak tlehin a timankai chak ta niin an sawi.
Tual chhung fire service chuan thelhtu 168 tirh niin fire engine leh helicopter nen an bei tih a sawi.
Bouches-du-Rhône huam chhungah hian May 19 atang khan ruah a sur tawh miah lo niin French broadcaster BFMTV chuan a tar lang.
France hmun dang, Narbonne bula Thawhtanni atanga kangmei chhuak pawh a la kang zel a, darkar khata km 60-a chakin puiin hectare 2,000 vela zau a kang tawh.
Spain-a Catalonia region-ah pawh khawchhak lama Tarragona province-ah ram a kan avangin mi 18,000 chuang pawn chhuak lo tura tih an ni.
Thli na tak tleh karah kang thelhtu 300 chuangin an thelh mek a, hectare 3,000 dawna zau a kang tawh.
Spain hmun thenkhatah hian June thla khan a lum ber tum an tawng hlawm a, ram a kan mai hlauhna pawh a tam hle.
Greece-ah pawh Thawhtanni thleng khan hmun 41-ah ram a kang a. Heng zinga 34 chu thelh tawh niin pasarih erawh a la kang zel niin fire service chuan an sawi.
Europe khawthlang leh chhim lam hian tun nipui hi an tuar hle a, ram a kan nasat bawk avangin chhungkaw tam tak hmun himah an insaseng.