Kum 29 mi ni chunga 2020 Australian Open tan hma lawka tennis a chawlhsan thu lo puang tawh Caroline Wozniacki chuan Ningani khan Tour-a kirleh a inpeih tih a puang.
World number one hlui hian chhungkaw din a duh avangin tennis a chawlhsan zawk a, khatih chhung khan a pasal, NBA player hlui David Lee lakah fanu Olivia leh fapa James a hring a, tunah chuan tlemin a hulhar ve leh ta a, tennis inelna hmachhawn turin a inpeih-chhuak tawh tih a sawi.
Danish player Wozniacki hian a career-ah chawlhkar 71 chhung world ranking-ah No. 1 nihna a chelh tawh a, singles title 30 a lak tlin tawh zingah Grand Slam title pakhat 2018 Austra-lian Open title a tel nghe nghe.
Wozniacki hian August thlaa khelh tur Montreal khawpuia Canadian Open chu a kirlehna tur a nih thu tarlangin, chumi hnuah US Open a khel ang a, Paris khawpuia 2024 Olympics lam a hawi zui leh ang.
United States Tennis Association pawhin Flushing Meadows-a tum hnih final khel ve tawh chunga la champion lo Wozniacki chu August ni 28 atanga khelh tan tur US Open-ah wildcard an pek thu an puang chawpchilh ve nghal.
Thla thara kum 33 tling chho ve tawh tur Dane hian tennis-a a kirlehna kawngah fanu Olympia a hrin hnua kirleh 23-time Grand Slam champion Serena Williams chuan a fuihphur tih a sawi.
A chawlh zawk hnua kirleh tum Wozniacki
Get real time updates directly on you device, subscribe now.
Next Post