A chipui Svitolina hneha semi-final lut Kostyuk

A chipui Svitolina hneha semi-final lut Kostyuk
French Open women’s singles qualrter-final match pakhatah Thawhlehni zan khan Ukrainian player ve ve intumin, Elina Svitolina laka 6-3, 2-6, 6-2 hnehna changtu Marta Kostyuk chuan a career-a a vawi khatna atan Grand Slam semi-final a lut ve ta hlawl a, a hnehna sualchhuah hi Ukrainian mipui tan a hlan zui nghal.
Kum 23-a upa Kostyuk hian on-court interview-ah tunhnaia Russia missile-in an khawpui ber Kiev a bitum leh boruak behchhanin a chipuite tana a hnehna sualchhuah a hlan a, a mittui a dang zo lo.
15th seed Marta chuan hian last-four match pakhat zawkah an hmelma Russia chhulchhuak Mirra Andreeva ngei mai a hmachhawn leh dawn a, a tang na khawpin a rinawm!
Russian tleirawl Andreeva hian quarter-final match pakhatah Thawhlehni zan khan 6-0, 6-3-in Romanian veteran Sorana Cirstea chu ruahsur hnuaiah a hneh a, Roland Garros draw-a hming hraw an tlak zawh duak tawh avangin a Grand Slam title hmasaber tur a hmin hnai tiin sawi ila a awm lo lutuk lo mai thei!
Kum 19 mi Andreeva hian a vawi thumna atana Grand Slam quarter-final khel Cirstea lakah harsatna lian a tawk lo a, Court Philippe Chatrier chung khuh (roof) hnuaiah set hmasa zawk kha minute 24 lek chhungin a la fel hman!
|um 16 chak tlinga tleirawl zinga Paris main draw hnehna chang hnem ber ni chho ta Andreeva hian tun season tawp ruala professional tennis chawlhsan ve tawh tur Romanian kum 36 mi ni tawh Cirstea tan eng zahngaihna mah a lantir lo a, kum hnih kalta ang bawkin French Open semi-final a lut ve leh ta phawt e.