A chung berah Real an tawlh chho

A chung berah Real an tawlh chho
First half-a Kylian Mbappe goal hnih thun tum Pathianni zanah Real Madrid chuan 4-1-a an mikhual Las Palmas sawpin Spanish La Liga table-ah hma an hruai a, an lehpelh tak Atletico Madrid lakah point hnihin an sang.
Minute khat em pawh a liam hmain Fabio Silva chuan mikhual hmahruaina goal a thun er zawk a, Santiago Bernabeu chhunga mipui 74,808 tehreng so phul bulh bulh thawm a reh duk!
Chutah France captain Mbappe chuan minute 18 an khelh tlin rualin Real siphurh hi penalty chhuilutin a sut a; he penalty hi Rodrygo laka Sandro Ramirez-a foul hrinchhuah a ni.
Darkar chanve khelh pelh hlekah Lucas Vazquez siamsak atangin Brahim Diaz chuan home team tan a khung belh a; minute 36-ah Rodrygo thawhrah atangin Mbappe goal hnihna a lut zui ve leh a, season kal laia a league goal 12 tihluhna chiah niin, half time-ah Spanish giants hian 3-1-in hma an hruai phawt.
Second half tir lam minute 57-ah Rodrygo chuan Real goal lina leh he inkhela goal lut hnuhnungber ni zui ta a thawh ve leh a, table lerah Carlo Ancelotti team an chho zui ta a ni.
Las Palmas half-time substitute Benito Ramirez chu Vazquez laka a chet dan hlauhawm avangin minute 64-ah hnawhchhuah niin, a tirah yellow card hmuh phawt a ni a, video assistant review hnuah red card pek a ni ta zawk a ni.
Tarlan tak angin, he result hmang hian Real chuan Inrinnia Leganes laka tlawm Atletico Madrid lehpelin table-ah hma an hruai zui ta a ni.
Si phur hmasa zet chunga inkhel an thunun ngheh hmiahna inkhelah Real Madrid hi kha aia turu daiha chak tur an nih laiin an goal thum ngawt chu offside avangin hnawlsak an ni a, chu’ng zingah chuan Mbappe’hat-trick goal’ tur telin, England midfielder goal thun thei Jude Bellingham pawhin kha game-ah vek khan vawi duai lo a goal thun theihna hun tha a bawhpelh bawk.
Bernabeu club hian khelh 20-ah point 46 hum tling tawhin, an lehpelh tak Atletico hnuai chiaha pathumna luahtu Barcelona chuan Inrinni zanah 1-1-in Getafe an han inhnehtawkpui leh rih a, hmahruaitu thar Real lakah point sarih ngawtin an hniam tawh!
Valencia laka a red card hmuh avangin Pathianni zanah Vinicius Jr a inkhel ve thei ta lo a, kha lo kha league match khat dang hremna a la tuar chhunzawm leh dawn a ni.
Inkhelh banah Mbappe chuan Inrinni zana an elpui lian pahnih Atletico leh Barcelona chetchhiat laia anni’n hnehna an chang bik chu a lawmawm dan a dangin, result pawimawh a nih thu a sawi a; hma taka si phurh chu game tikhirhkhantu a nih thin thu leh chuti chunga an team beilet dan ropui a tih thu hahipa sawiin, an khelh that em avang leh goal khung kawnga harsatna an tawh loh avang khan nuamti takin an khel thei tih a sawilang tel.
PSG chhuahsana a club zawm theih lawk loh a pan hnuah beisei angin khel tha nghal buan buan lo mah se France captain hian Spain leilungah a theihna a hloh hlen lo a, Pathianni zana goal hnih a khung hnuah a rilru pakhat sawichhuakin:
“Real tana khelh hi ka dream a ni thin a, khelmuala fans lamin ka hming an lam rik nuai nuai hun hi ka thlir ber pakhat a ni a, chu hun ka tawngbaw thei hi ka hlim a; ka hlim em em chhan dang leh chu he team-a ka insiamrem thei ta leh ka duh ang taka khel chunga nuamti taka game ka khel thei hi a ni.”
Naktuk, Nilaini hian Champions League lamah Real Madrid hian Red Bull Salzburg an mikhual zui leh dawn a ni.