RK Dawla
Mb 9366095658
-- Advertisement --
1. Easter Sunday-ah beisei loh deuhin hmun hrang hrangah ruah tam leh thli a thawk chiam mai a. Pathian Biak In leh Pandal hial thliin a sawp chhia a. Thei pâr leh zâr tam tak a lên chhe bawk. Hun reilote chhung mah ni se, Nature hûhnâng natzia a chiang viau. Social vangin, chanchin tharlâm kan inhre pawh zung zung thei tawh a. Khaw awmdan a danglam hlekin khawiah emaw ‘pawi’ a thleng zel ti ila, kan sawi sual âwm love. Chutih laiin, heng chhiatna lo thlengte hi inven leh lo inralrin dan kawng a awm em tih lamah beng kan chhit a tul hle. Thil thleng (events) ringawt buaipui lovin, idea mumal paw chhuak khawpin hringnun kan chhiar thiam a pawimawh e.
2. Mizoram hmar leh khawthlang lam hi ruahtui an dawng hma-in an dawng tam tlangpui thin a. Thli, ruah, rial leh têk vangin harsatna a thleng kum tin a. Hei hian kan thlai chin dan (cropping pattern)-ah pawh lo inbuatsaih dan kawng kan zawn a hunzia a tichiang hle. Huan thlai ilo ven nâna thingbuk zung nghet (wind break) phun te, thli natna leh ûpna hmun azira thlai chin tur bik thlan chenin thlan thiam a tul âwm e. Kum tam thawhrim rah a thlawn a, indin thar leh turin kum tam a ngai fo thin. Tin, kan hmaih fo thin chu tuihawk – PWD dept leh farmer-te hian! Thli, tek leh rial chu an hnathawh a langsar a, a pawi khawih lenzia kan hmu thiam mai a. Mahsela, kan huan lei chunglâng, hâng lai tak vawikhat tuihawk tamin a sawpchhiat theih dan erawh kan chîk lo mai thei. Hmuh theiha chhiatna lian tham – leimin, lei tlahniam, sabereka khuangkaih etc a nih loh vangin ‘pawi’ a thleng lo emaw kan ti mai thin. Mahse, hei hi a dik lo. Kan huan enkawl dan tam berah hian tuihawk vanga lei chunglang kalral hi rapthlak tam takzet a ni a. Hei hian a kum têlin thlaiah harsatna a rawn thlen a. Farmer tam ber chuan natna, rannung etc kan mawh puh fo. A chhan leh vang bulbâl kan dâwn pha lo fo thin. Leilung (soil) a fit loh chuan, thlai tharhlawk reng har tak a ni. Khawvel pum sik leh sa inthlak (Global climate change) vanga tawrhna hi a la hluar zel dawn a, tun atanga kan inbuatsaih lâwk a tul hle mai.
3. Organic farming step hmasa ber chu thlai chawmna tur leitha ni lovin, leilung enkawl thiam (proper soil management) hi. Hei hi sustainable farming lungphum hmasa ber a ni. Hemi tel lova pawnlam atanga leitha hmanga châwm ringawt hisâp hi chu a hautak lutuk, tlin sên chi a ni lo. Kan leilunga thatna awmsa vawnhim leh siambelh kha hna pawimawh hmasa a ni. Thlai natna leh eichhetu rannung tam ber pawh hi leilunga zung kaih an ni a, lei balance thaah chuan an anpui hrik tangkaite leh anmahni eituten an control a, an puang hluai thei lova. Lei balance lovah erawh, anmahni eitu leh competitors an awm mumal tawh loh avangin, thlai natna chi khat mai pawh, namên lovin a puang hluai mai thin. Entirnan, organic matter tam leh nisa laka hliahtu/khuhtu nei tha leilungah chuan, fungi tangkai an tam a. Fungi an tam miau chuan, a eitu micro-arthropods leh beneficial nematodes an lo tam leh a. Tichuan, chutiang leilungah chuan fungal natna hlauhawm – Pythium, Phytopthora etc tân inthlahpun chu sawi loh, damkhawchhuah pawh a har thin! A chhan chu fungi tangkaite khan an tam-hneh a, antibiotics tichhuakin a tangkai lo an suat a, predators (beneficial nematodes leh micro-arthropod)-te khan chhun zan zawmin an ei bawk a. Tichuan, fungi hlauhawm vanga thlai natna kha control a lo ni thin. Organic farming bulthut chu soil management system rintlak tak neih hi a ni hmasa e.