A CLOSER WALK WITH ORGANIC FARMING – 17

RK Dawla
Mb 9366095658

1. Mizoram hmun tam zawkah chuan ruahtui chat lak hlekin, khawlum kan tuar ṭan a. Cheh-phut/Leh-phut loh leilung erawh a hnâwng ṭan viau thung. Tuihna recharge tham ruah kan la dawng meuh lova, rannung chi hrang hrang lei aṭanga an rawn pian/keu ṭan hun kan thleng chiah bawk. Nipui a lo thâwt hian Pathian thilsiam ropuizia a lang chiang lehzual ṭhin a… Ramhmul a rawn chawr hring nalh chhova, a pâr chi an pâr bawk a, khuai leh rannung chi hrang hrangte an rawn inthlahpung chhova. Chutih rualin chûng rannungte eitu tur Savaten inthlahpun tumin chhungkaw thar din leh bu chheh an ṭan nghal bawk a. Khua a dur kuih kuih a, ṭo thli a thaw fur fur a, khawpui ri rum rumin vansâng a màwi a. Ruahtui tlâk hun a inṭan tih entir nân chunglamin ruah karah rial a rawn pawlh fo bawk a… Nature-in aw râwl a chhuah tak tak chuan, reilote chhungin thil a danglam kâwk kâwk mai ṭhin.
2. Nature leh a ken tel thil tinrêng hi Pathianin min pêk an ni a. A ṭhente chu amah (nature) kan enkawl thiam loh vanga kan tawrh a awm bawk. Engpawhnise, hêng tem leh hre thei, hmu thei leh ngaihtuah theia kan la awm hi Pathian zahngaihna ropui kan dawng a ni. Mahni hma kan sial lutuk a, kan duh chin chauh awmtir a, kan duh loh tihbo kan tumna lamah tûr leh hmanraw hlauhawm pui pui kan siamchhuak a. Nikhua a lo rei zel a, kan tih fuh lohzia a lo lang leh fo ṭhin. Duhâm leh mahni hma sial rêng rênga damchhung ni hmang tlingtla tura siam kan ni chiah lo ania, mihringte hi! In-ei-tawnna khawvel (ecological food chain)-ah kan chêng a. Vawiinah hian inchei nalhin hruanghrau ti na viau mah ila, engtikniah emaw chuan lei hrik leh thlanmual bûngte ei ral turin min la phûm ṭawih dawn tho tho! Kan tihdanglam theih loh, nature kalphung tam takte hi chu, a pawm thiam lamah kan ṭuan mai a ṭha ṭhin e. Pathianin a thilsiamte enkawl min la phalsak hi lawm fo tur kan ni zawk. “A tawk e” a tih vaih chuan, khawi Damdawi In ṭha leh Doctor thiam mahin min chhan thei hauh lovang… Chuvângin, farmer-te hi, lawm chunga hna thawk mai tur kan ni. Midangte aia chan chhe bik riaua kan inhria a nih chuan, keini aia chan chhe zawkte dinhmun ngaihtuah tel ṭhin ila. Vui dur dur tur kan ni lo, Pathian pawhin vui hmang a lâwm ngai lo!
3. Tin, Mizote hi Pathianin min hmangaih bik riau a, kan ramah engpawh a tha duh bik tih hi thil awihawm loh satliah mai a ni. Pu Vanneihtluanga phei chuan, Pathianin Mizote min hmangaih bik nia ngaih tlatna hi ‘Tribal pangchang theology’ a ti hial a nih kha. A zir peih peih, remhriatna peipung peih peih, a thawkrim apiang leh A duhsakzawng apiang Pathian hian malsawmna a pe mai ṭhin. Lungawina nun nei lo, vuivai peih êm êmte phei chu Tuipuisen to Kanaan inkarah khan a kuk fawk fawk mai a nih kha. A dìm lem lo khawp mai. ‘Pathianin thil harin mi a siamṭha ṭhin’ tih kan sa tlut tlut a, kan thlai leh ran ilovah harsatna kan tawng dêk dêk a, beidawngin ‘ka tluang lo’ kan ti leh mai mai a. Siamṭhat hlawh pha lo tâwk chiahin kan pêng kual leh fo ṭhin. Harsatnate hi kan zirlai tura Pathian min pêk a ni a, chumi zir thiam tur chuan course chi hrang hrang kan lo zir thiam lâwk pawh a ngai hial zawk a! Awlsam taka hlawhtlinna chan intihhmuh tak hnam kan ni hial mai thei. Kan thlaia natna leh rannung harsatna lo thlengte pawh mahni tâwka zirchian tum ai chuan, awlsam deuha kah dam tum fur kan ni chiang! Hengho hi mi khawngaihthlâk tak an ni, eng salah emaw an tâng tlat a. An harhchhuak mawh êm êm lehnghal… Organic farming hlawhtling tak tak tur chuan, kan rilru puthmang hi a dik a ngai hmasa tlat a, chuvangin hêng thute hi uar takin kan sawi a ni e.