A CLOSER WALK WITH ORGANIC FARMING – 22

RK Dawla
Mb 9366095658

1. Cyclone-in min nuai a, hmunthenkhatah chuan kan chhe viau. Ni 2 khawchêng vanga leimin pawh kan tuar hle. Nunna hlu tak tak kan chânin, in leh lo leh bungrua tih tham fê a chhe bawk. Ruah tam pangngai 150-200mm chauh pawhin, heti taka pawi a khawih thei a nih chuan, environment lama kan harh a hun takzet tih a chiang. Chhungkua kan harh a ngai a, khawtlang leh kohhran, NGO leh Political party thlengin kan harh a ngai! A chhan chu, tha leh sum, hun leh ngaihtuahna tam tak sênga kan hnathawhte hi, mit khap kâr lekah a chhe vek thei. Khuarel chhiatna kan tih tam takte hi chu kan thiltih or nundan phung dik lovin zawi zawia a thlen a ni thin. Tuifûr tla mai ni lovin, lirnghing chenin kan la hmachhawn chho zel dawn niin a lang a. Vawiina kan nundan/thiltihin khuareia a nghawng theih dan tur inzirtirna leh nakin hun atâna inbuatsaihna changtlung tak kan mamawh khawp mai.
2. Farming-ah pawh hian chemical farming hi a awlsam zawkin a lang a, a hahthlâk nêp zawk bawk. Mahsela, khuarei kan thlir a, kan environment leh keimahni hriselna kan thlir chuan, Mizoram tân chemical farming promote chiam hi thil tihchi ber niin a lang lo. Organic/Natural/Biological farming erawh tlema harsa deuh hlek, kual kawi hlek leh ruahmanlâwkna kimchang tak a ngai a. Hei vang hian mi tam berin an interest lo thin. Development kan thlir dan leh kalpui dan tam tak pawh hi Chemical farming ang chiah a ni fo. Tlona leh nghehna ai chuan hlawk thuai, a pârvul chen thuai kha focus a ni thin. Khawvel hnam hrisel lo ber pawl, intodelh lo ve tak, leilung hânna (soil fertility) hniam tak, leilung derthâwng êm êm ni chunga kan la harh thei lo a nih chuan, kan hmabâk hi a nêp lo chho viau zel ang. thâlah tuihnâ a kangchat nasa zual zel a, furah tuilian leh leimin a hluar kum tin a, thlai râl leh natna a pung zel bawk. Engemaw chu kan ngaihtuah a ngai a ni lo’m ni?
3. Tunhnaiah ‘Save the Riparian’ hovin tui kawr dung thenfai harhna meichher an rawn chhi a, vanneihthlak takin ramchhung hmun dangah pawh he harhna hi a darh ta hlauh mai a. Thil lawmawm tak a ni. Kum 130 chuang Kristian tawh, Biak In ropui tak tak sa thei, fashion leh eiturah pawh khawvel rual pawl phà ni si kha, kan bawlhhlawh paihte kan hmuh phâk loh chuan, kan ngaih a lo tha hle tih kha a lang chiang ta khawp a. Anganwadi zirlai ni âwm lekin faina lairil neih kawngah kan lo la che chukchu hle mai a. Kan nunphung dik lo hian vantlang himna leh hriselna a nghawng a, kan thlai tharchhuah leh hralh kawngah pawh kori a tu tih ngiahtuah pha kan tam hauh lo tih a chiang ta! Hetiang a nih chuan, kan nihna hi kan pawm a, bultan tha leh tura kan inhuam a tul chho ta zawk a ni. Silh leh fen mawihnai aiin eitur hrisel a pawimawh a, in leh lo ropui aiin a chhehvel thianghlimna kha a pawimawh zawk a, changkanna nazawng aiin hmasawnna tlo leh himdam kan buaipui a hun tawh e.
4. Kan ram hi a zau lo, Square kilometre singhnih bial chauh a ni. Renchem taka hman daihzai hi thupui ila. Kan tu leh fa, kan thlahte lo la piang lehzel turte tân, hnuhma tha hnutchhiah i tum teh ang u. Farming sector atang hian chêt la thar ila. Tlo zawk, daihrei leh himdam hi kan thupui ber ni sela. Hausak hluai tumna hi Milem biakna, Bible-in a huat êm êm, hrem lohva chhuak miah lo tur nihna a ni a, |IH TUR DIKA khi tih chungin ngaihtuahna thar nên puanven i sawi chhîng teh ang u.