RK Dawla
Mb 9366095658
-- Advertisement --
1. Aug thla a lo nih meuh chuan, ruah bawhawk pawh a ziaawm tan a, ruah phingphisiau leh chhum zing chiai chiai karah kan lêng leh ta. Boruaka hnâwng a la tam a, nakum lama phun tur atân thei leh thlai tang polypot-a vihnun hun lai tak a ni e. Nimbu, panhnah, thinghmarcha, tam-thing etc te, polypot-ah lo vitnung lâwkin, a kum leh monsoon intanah phun ila, an nung tha zuiin an thang tha duh bik êm êm. Boruaka hnâwng (relative humidity) a la tam avangin thlai kuang leh tang vih hian zung an la chhuah awlsam a. Direct-a phun tur erawh chuan, kan hma lawkah an dormant hun (thlasik) a awm avangin an tuarchhuak zo lo deuh thin. Polypot erawh controlled environment-ah kan dah theih avangin thlasik hrêk nat pawh siamrem a awlsam deuh thung.
2. Thlai kumhlun (kuhva, serthlum, Litchi etc), a hmuna neite tân huan sâm hun lai tak a ni bawk. Leilung hi hnimin englai pawha a khuh reng hi a tha ber a. Thlai dîp khawpa hnim insiam tur erawh kan vên a ngai thung. August thlaa sàm hian, favang chhungin hnim a rawn insiam thar leh hman a, chu chu thlasik chhunga leilung khuhtu turin a tangkai êm êm. Fruit trees plantation-ah chuan, fai taka leilung enkawl hi âtna chi khat a ni zawk a. Leilung venhim leh siamthat hna thawktu tak tak hi hnimte hi an ni zawk a. Anni enkawl thiam hi kan hahdamna, tharhlâwkna leh tlona tur zawk a ni a. Hemi hrethiam duh lo farmer tam tak hian an tuar mêk a, an la tuar zel dawn bawk. Kan tunlai khawvel boruak lo lum zel hian, kan leilung leh thlaiah pawh nghawng tam tak a rawn nei chho mêk zel a. Hei vang hian fruit trees farmer-te pawhin, thlai kumhlun pawh nise, kan chinpawlh thiam a hlu chho zel dawn a. Hei mai ni lovin, hnimte pawh chi hrang kan huana kan awmtir thiam a tul chho zel ang. A chhan chu Pathianin leilung a din dan hi chi hrang infinkhawm (diversity) a ni miau a, SIAMTU formula hi a tlo ber zel e.
3. Thlasik thlai chin a hun chho leh tan ta a. Terrace leh luipui kam phaiah te hnimpui kan vâtin kan sâm leh hlawm ang. Hetih hunah pawh hian, kan samna hnimte kha lane mumal tak neia chhepkhawmin, changel hnah/polythene ilo hmanga khuh hlum kha a tangkai êm êm. Zawi muangin a tawih a, a vêlah leitha a semdarh thin. Mi tam tak chuan kan chawhmeh thlai chinna hnim kan thlawhin vàu-ah kan paih mai thin a. A uihawm êm êm. A lane-a chheh thin tur a ni. Kan hlo chheh a nung a nih pawhin chawlhkar khat hnu-ah letling thawk ila, lei hrula an zung chhuah kha vanlam hawiin kan pho ta a. An thi teuh thin. A nih loh pawhin, Zêm kual ila, chutah chuan kan hlo thlawh apiang kha thiarkhawmin, thla 3/4 hnu-ah chuan, leitha tangkai tak, dûr tha êm êm kan thar teuh mai thin. Farmer tam tak hian thlai enkawlna tur leithate hi dawn kher emaw, lei kher emaw kan tum thin. Mahnia insiamchhuah tumna kan nei tlem hle fo. Kan tum tak tak a nih chuan, tin 2/1 hmun lek kan thlai enkawlna tur leitha insiamchawp hi thil harsa a ni lova. Kan ngaihtuah loh vang leh kan tum loh vang mai mai a ni thin. Thlasikah hnahthel ro kan ngah êm êm a, hei hi dahkhawmin, monsoon season-a hnim rawn chawr thar nen chawhpawlh a, uptawihin leitha quintal tam tak kan thar thei reng a ni. Company siamsa leitha-ah kan innghah reng chuan – kan thlai thar man a to telh telh ang a, kan thlai thar quality a hniam telh telh ang a, kan leilung a chhe telh telh ang a, natna leh rannung hnawksak kan ngah telh telh ang a, kan tharhlawk lo telh telh ang. Eng kawng nge kan zawh dawn le?