THLIR KUAL VELNA. BUNG – I (Random Thoughts Wild and Free)

F. Lalremsiama, Chaltlang

-- Advertisement --

Ka ti puam nghal ringawt dawn. Kan Sub-headline pawh a puam nghal telh telh. Kan thupui lah a bul tet tawt naa a kualkhung zau tho tho dawn chiang. A lanna tlang dang tih vel ngai lo tura “Thlir Kual velna” rawn ti talh ka ni! Sub- Headline a ka Random Thoughts Wild and Free pawh – “Ngaihtuahna kual vel, suangtuahna zalen, duhthusam ang dawn dawn, tuma thunun theih loh, Halpuah halmawi ang leka khap beh theih hauh loh, Dan zawng zawng chunga leng a ni chiang. Mimal rilru ngaihtuah tuman an hre thei lo. Court -ah Case (FIR) a awm ngai lo. A awm thei lo reng reng! A hnuhnung “Free” khian a hmasa “Wild” khi a hmakhalh chat ta mai reng a. Chutiang suangtuahna Zalen Tarmit vuah chuan kan thlir kual vel dawn ta a ni. Fundamental Rights te chu “leu set” nep zawk fe, Human Rights (UNO Declaration 1948) ai pawha ril, Ka Birth Right liau liau, mi tin tung chhoa kal zawng zawngte chanvo chu a ni. Hnampui hmingthang British leh French hoten kum 500 chuang fe liam tawha an Lal lute an lo tan phah tawh Liberty, Freedom and EQUALITY te chuan min zem reng a. Zoram khawvar nghaktu Pu Zosiama Pachuau (RIP) te min la dampui Pu Lalsawta te chu an la lang lian ta zel tho mai! An Manuscript min rawlruktu a Sr. Minister mek nghe nghe.
Kan thu inhmakhalh kha sawi belh a tul ta Zalenna ramri awm lo chin lem nei loah chuan, ngaihtuahna Bumro Bonra Buluk ang taka ri wild chuan pawisawi ahnekin Zalenna tawp nei lo, nangma thu thua, i duh duh i duh zawng zawnga thlir kual velna a pek chu alawm a wild ber lai. Ka han saptawng deuh awlh awlhna chhan pawh! Pu H. Lalsiama te Pu Sangliana ten Saptawng min zirtir thiam ta sa sa, tuna kan hman lohin engtikah nge kan hman chuan tawh ang? Ka heti zui zeuh zeuh anga Peh-hel loin kan chheu kawrh kawrh mai ang chu!!
Engpawhnise, kan han tihpuam ve telh telh hi chu Chiahpuam te, Khehpuam te ai kha chuan a tha zawk hrim hrim. Ka hmangaih Mizotawng pawh ka tih hausak phah loh pawhin, ka ti pachhe hauh lo ang. Mizo nih hi a tawk mai ka ti ve mai. Thudik kumhlun (eternal truth) pawh i phawrh nawn lehnghal law law ang, chu chu lungpui pawh lungtein a kamki loh chuan a awm thei bik lo, tumah Lal Hnambik an awm lo. Tumah Hnamchawm kan awm bik tawh lo, mipui vantlang Aam Aadmi kan ni vek tawh! Sailo Lal an tam ber, khua pawh an nei tam ber. Ralte Lal te, Hmar Lalte, Paihte Lalte, Zahau Lal, Zadeng Lal, Hualngo Lal, Fanai Lal, Mara Lal, Pawi (Lai) Lal te. A dang dang te pawh an awmin a hriat.
I mizo leh lawk ang. Ka’n tan ange aw. Ni lo, ka’n chhunzawm ang e! Keini thingtlang Mizo kan MASI zo chauha Aizawl mizo pawh an Krismat zo tho naa a boruak a la dai thei tak tak lo. Ka ti lehpek thin ang: kan hla a ril, a fan a na, a thluk a mawi, sak a nuam a, a hril a sawi a nuam bawk sia, a tluang mar zan zan zel lehnghal! Pu Vankhama te, Pu Rokunga te, Pu Patea te, Pu Suakliana te, Pu Kamlala te, Pu Liangkhaia te….aw, an tam mange, ka sawi seng lo. Siampuii te, Lalruatmawii te, Lalenkawli Pautu, Ka Star te awmawi ri te chuan hma fe atang khan mi zem vel mahse, TV leh Radio Lengkhawm zaikhawm leh Zaipawl Hlarem chherchhuan tluk tluk leh a tak ram tak tak te chu a nung thi thei lo! Mite hi an lo va tangkai bik tehlul em ti reng reng hian kan lei taksa chu, piallei thuah riat hnuaiah a luang ral dawn si a aw!!
Kumhlui leh Kumthar boruak a inthial a. Halpuah Halmawi ninawm ta mai mai, Municipal, LC/VC Term tihtawi leh doletna kal vel ten min nuai buai lo. ZPM Sorkar, Pu Lalduhawma CM kaihhruai an che tha thawkhat… tha thawkhat ka ti thei rih chauh. Thutiam tlanghriat, “Eiru lo turin” a tha thlawt. Enchhin Sorkar leh Hruaitu “Kalphung Thar” Kum khat fiah an dawl zo rih viau. Lungrual leh inpumkhat tulzia hriain an la zawm tha. Sorkar hnathawk hlawh leh Pension a hunah an pe thei. A hma ai chuan a tha em em, a lawmawm! Mahse Kolkata Ballygunge-a Mizoram House Hlun, tha em em MNF Sorkar hralh, thiatsawm lak let a la ni lo. Sorkar ukil liante bak baka Law OSD, Zofate Chhuantawlawl leh pa fing, Pu JF Manliana thlah chawrno leh laklet tumtu lalber CM pawh an reh rei ta lutuk deuh. Inrenchemna an tan that ang huin an chhunzawm tha tawk lo deuhin mipuiin an hria. “Mipui Sorkar” ni chiah turin kei chuan ka ngai si! Finance Deptt. hnuaia State Lottery Deptt. ah Pathian Ram a thleng har lutuk tiin, a thlen hun tur nghakhlel takin, Chatuan khawvar hma ngeia hmuh ve hman ka chak tlat. Pastor Pension te, Kohhran Upa min te engemaw zat koritu thei tur hmun luah mek te, Hotu ber CM lah chuti tho bawk lehnghal. Kumthar hna hmasa ni tawh se? Lengpui Airport te ZMC te kan Sorkar kutah a la awm. Himtlang chatuan se ka va ti tak em! An ram neihdan te kha a danglama, a Mizo teh asin! Hrechiang hlawm ila kan fak ning lawng. Kan veng, Chaltlang Tourist Lodge te hlei hlei hi CHAN bo ka hlau mang e. India rampuma IPS hlui Chief Minister ni thei leh la awmchhun, ka hriatchian leh ka chhuan hi hlawhtling zel se, a Sorkar pawh ka ti ve teh asin maw le!
Kumhlui nen Chief Secretary hlui a liam a, a thar kan nei tan. State lu ber Governor Kumthar ni 2-ah a kal a, a thar ni-15 a lo luh kan beisei. Lu neilo State chuti chen chen a ni tur em ni lah kan hre ve phak si lo. Constitution chipchiar ber leh lian ber kum 75-na kan lawm a. Ziakah a chiang fek fawk lo em ni aw? Kei LLB lo, Dan hre lo mi, Protocol leh Convention hre ve nil nial lek “Val hi ka chiang LO chiang lutuk”! Hei pawh hi ka tan kalphung thar!
Sawtilai Chakma Political Musical Chair inchuh vel vei karah ZPM hruaitu lam te MLA Candidate siam lai vel leh tunhnai thlenga an BAWL zawk mah maha lang hi a mak ka ti. Mak dang leh chu USA inthlanpuiah Donald Trump-a’n Democrat Candidate Hillary Clinton a tlawm tawh a, Kamala Harris a tlawm nawn leh hian min ang, kan inang a ang? Hmeichhia hi kan la iai tlang niin a lang. Kum tawp tepa thil thleng 2, mi run zet zet chu PM hlui Dr. Manmohan Singh-a leh USA President hlui Jimmy Carter te thi kha a ni leh ve bawk. India Economy tlu chhia siamthaa chawisangtu, Civil Nuclear Deal leh MNREGA, Ni 100 inhlawhna siamtu, pa Dik leh zaidam, Mi rethei leh harsate hmangaihtu kha ui lo an vang khawp mai. President hlui Carter-a lah President hlui kum 100(za) dam chhun, chawl loa thil tha pui pui atana a inhman zui reng vanga khawvela chawimawina sangber, Nobel Peace Prize dawngtu a ni. Kristian chhungkaw chhuanawm an ni bawk. An uiawm ngei mai. Tunlai indo nuaih nuaih karah te hlei hlei hian.
Bung 2-na tur, Lalpan rem a tih chuan, Thlir kual veltu chanchin, pian-leh-murna, seilenna ram khawvel, a kalkawng chhuk leh chho, chhanhimtu leh maltin sawmtu hnathawh hmuh theih turin chiang fek fawkin thlir kual vel kan tum dawn nia.
Kumthar Chibai vek u.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More