A CLOSER WALK WITH ORGANIC FARMING – 39
RK Dawla
Mb 9366095658
1. Khuangchawi thla kan thleng a, thlasik rim a tan. Khawvel Chhandamtu piancham kan hnaih leh ta viau mai. Chutih laiin A pianna ram bâwr, Middle East lamah chuan ‘huai ber’ nih tumin an inphilin an inkâp a, an inphîn dur dur mêk a. Mipui thlabâr leh mangang an phi ruai a, nunphung tinrêng a buai kawkalh nuai a. Chutiang ram buaiah pawh chuan, mi tinin, khêl lova, mamawh reng, rei chat-lak chi miah loh chu EI LEH IN tur a ni. Khawi ram pawh a ralmuang emaw muang lo emaw, a hausa emaw a pachhia emaw, a ropui emaw a tlachhia pawh ni tehreng sela, ei leh in tur hi thil pawimawh hmasa a ni zel a. Middle East, oil ngah ram, hausa namên lote pawh nise, oil a ei theih miau loh avangin an oil chuan an chin ve theih loh ei tur lei nân sum tam tak an hmang lo thei lo. Mihring leh thilnung dangte dam khawchhuah nân hian ei leh in tur aia pawimawh hi vâng tak a ni!
2. Tunhma lawk kha chuan, kan eitur tharchhuaktute kutke hnai ber, Agri & Horti Dept hnuaiah hian hmun kilkhawr tak takah pawh Circle office siam a ni thin a. Hei hi thingtlang hmun kilkhawr zawk, District capital leh Sub-division hmunpui tlawh zung zung theilote tân, awlsam zawka an dawr theih leh mamawh lamna pawimawh tak a ni thin. Mahsela, engti zaizia nge ni tehreng ni, circle chu titawpin block-ah then a ni ta pawp mai a. Hei hian Dept leh farmer-te inkarah hmun âwl zau tak a siam ta a. Ram hmasawnna tura pawimawh ber pakhat, kuthnathawktute tân chuan, inhremna tênau a ni ngawt ta mai a. Kan district office-te chu han tlawh tehreng pawh ni ila, an neih ngun ber chu AWM LO hi a ni a. Thawktu lo thu fir fer mah se, a ‘kind’ emaw thurawn pawh, han hawn tur hi an pachhe ta êm êm mai a. Hetiangte chuan, engtinnge maw chak taka hma kan sâwn theih tehreng ang le? Tunhma kha chuan Neem kasto, Rock phosphate leh thlai damdawi hrang hrangte pawh, dept atang hian subsidised rate-a lei tur a awm bâkah, a châng phei chuan a semin an sem hial thin. Tunah farmer-te 5G internet nen, khawvel zau zawk hmu theiin, rual-el tanlâk nachâng kan han hre chho chiah a, an bazarna hnaivai Circle office titawpin Block-ah sawn hlat a ni a. Scheme engemaw bik a nih loh chuan, thlai nazawngah advice lak tur leh hmanrua hmuh a harsa ta êm êm. Hei hi kan sawrkar hian a ngaihtuah that a ngai a ni.
3. Nimin piah, Inrinni khan PM Kisan, 18th Installment chu farmer-te account-ah a lo lût leh ta a. Thlai chi leh hmanrua bazar hunlai a ni a. Tam tham ni lo mah se, tangkai takin farmer-te chuan an hmang fo thin. Tin, sawrkar laipuiin, kan ram economy backbone, farmer-te, a ngaihthah lo a ni tih-lanna scheme pakhat a ni ve rêng rêng a. Thil lawmawm tak a ni. Kan state sawrkar pawh hi, heti lamah hian harh chhuak ve sela a duhawm hle. Tun hnaiah sawrkarin thlai thlan bik 4-ah minimum support price pe turin ruahmanna a siam chhova. Mi nawlpui chuan la hrethiam rih lutuk lo mah ila, thil tih âwm tak, pawimawh êm êm a ni. Hetih lai hian state sawrkar pawh hian, Central tihdan zulzui deuh hian, sawrkar zêm zen pha ve lo farmer-te tân, incentive hi siam ve thei sela a duhawm hle. Officer ni lêm lo pawh, sawrkar hanthawk nghet an nih tawh dêk chuan, sawrkarin a duat êm êm a. A nihna takah chuan ram tâna tangkai lo ve tak tak, zu nam thut thuta office kai mai mai te, nileng deuhthaw-a office-a titi mai mai leh computer/mobile games khel mai maite hlawh leh hamthatna en hi chuan, ram hnuk khawihtu ber farmer-te chan chhe lutuk hi lungawi a har thin. State population atanga mi tlem tê, sawrkar hnathawkte hlawh chu a pung zawt zawt a, 7th pay an enjoy-na pawh a rei leh tawh. Chu mai ni lovin, allowance chi hrang hrangin a hual vêl a… Oil man pung, electric bill pung leh thil man sâng zel tuartu ber ber farmer-te, eng pay level mah nei lote hmakhua hi sawrkar hian ngaihtuah ngun lehzual sela a tha khawp mai. Sum tam tak dah a harsa ang, mahsela ‘farmer-te hi kan priority a ni’ tih an tih-lanna tur atân PM Kisan zulzui hian scheme siam a, kan sawrkar hian chêt a lâk a tul ta hle mai. Ngaihtuah a ngai e.