A dream tihlawhtling chungin Mbappe chhuak thei dawn em?

A dream tihlawhtling chungin Mbappe chhuak thei dawn em?
France striker Kylian Mbappe mai ni loin Paris St-Germain team pumpui duhthusam ni kumkhua chu Europe club inelna sangber Champions League trophy hawn a ni a, chumi tur chuan khawvela goal thuntu langsar ber ber – Lionel Messi leh Neymar Junior tihte an lo chhawr tawh a, kumin nipui thawt ruala chhuakbo ve tawh tur Mbappe an la ruai kal zel bawk a, chuti chungin an tum ram an thleng zo lo zel a, kumin erawh an hlawhtlin kum a ni dawn em kan thlir zel ang.
World Cup trophy baka Ligue 1 title panga hlawhchhuak tawh Mbappe tan Real Madrid a pan hmaa Champions League trophy sualchhuah chu a PSG career kharna duhthusam a ni dawn a, chumi tur chuan Thawhlehni zanah goal hnih khungin a team vawn lai chu Barcelona lakah hnehna a chanpui a, semi-final an chuangkai ta phawt.
|um nga ngawt Europe champion ni tawh Catalan team-in Champions League quarter-final second leg-ah Paris St-Germain hi Nou Camp-a mikhual loin an temporary home Estadi Olimpic Lluis Companys-ah an lo dawngsawng a; France ram first leg-a 3-2-a chak tawh Barca dinhmun a duhawm zawk a, an kawtkaiah nuamsaa tlang thei tura beisei an nih laiin Ligue 1 club hi 4-1-in Spain leilungah an chak nawlh a, khelh hnih belhkhawmah 6-4-in Luis Enrique team an tlang a, an superstar Mbappe tan hnuhma hraw lehzual hnutchhiah chunga kalbo theihna hun tha a inhawng zui zel.
Paris St-Germain forward Kylian Mbappe hi khawvela footballer tha berte zinga chhiartel ni tawh mah se Champions League-a a la champion ve lo tlat hi a kalh tikimlotu a nih hmek a, hei hi Europe-a champion thang Spanish giants a zawm chhan pakhat pawh a nih a rinawm hial a ni!
Frenchman kum 25 mi chuan Borussia Dortmund hmachhawn zui leh tura quarter-final an paltlang hnuah a hmachhawp sawiin, “Paris tana Champions League trophy hawn hi ka dream a ni,” a ti.
Sawizawmin, “He hmuna ka ni hmasaber atang khan PSG ka zawm thei hi ka inchhuang a, kan ram khawpui ber club behchhana ka seilian leh he club tana ka khel thei hi ka tan chuan a special takzet a ni.
“Parisian ka nihna zawnah pawh vawiin tlai ang hun ka tawng hi ropui ka ti a, Wembley khelmuala final khel turin pen khat kan la bak a, chi-ai mai loa kan inthunun tlat a ngai dawn a ni,” a ti.
Barcelona khelmuala goal hnih a thun leh nen season kal lai Champions League bikah Mbappe hian goal riat a thun tling chiah.
Paris khaw first leg-ah khan Mbappe hi a reh tlawk tlawk a, Barcelona khaw second leg-ah pawh khan second half tir lam minute 61-a penalty a chhuihluh hma zawng kha chuan a langsar zo leh chuang lo a, mahse, hun tawp dawnah goal khat dang thawh belh lehin, hun a tawp meuh chuan, a nih thin dan ngaiin, player langsar ber a ni zui leh ta tho a ni!
PSG boss Luis Enrique chuan inkhel thununtu a nihna zawnah a striker fakin, “|an phat atanga a tawp rat thlengin hruaitu a ni,” tiin hun pawimawha goal thun mai piahlamah captain ni chunga team a kaihhruaina zawn a fak tel.
Mbappe hian Champions League knockout round away game 12 a khelh tawh atanga goal 15 thun tling tawhin, match 39-a goal 23 ngah tling Cristiano Ronaldo chiah he tehfung bikah hian phak loh a nei.
Tralan tawh thin angin, Mbappe hian kumin February thla khan PSG president Nasser Al-Khelaifi hmuin Real zawm a tum thu a hrilh a, Spanish giants hian kum nga awh tur contract an ziahpui phawt dawn a, hetih chhung hian season tin euro maktaduai 15 (£12.8m) a hlawh dawn bakah kum nga chhungin bonus euro maktaduai 150 (£128m) tehreng a dawng zui thei dawn bawk!