A duh tihhlawhtlinsakin India-ah Australian putar phum

A duh tihhlawhtlinsakin India-ah Australian putar phum
Sydney, Australia-a cheng putar kum 91 mi, Donald Sams-a chu India nuam a tih em avangin a thih hunah pawh phum ngei turin thurochhiah a ziak a, a duhthusam ang ngeiin phum a ni ta.
Sams-a hian a thih huna a ruang chunga tih dan tur a sawi ang ngeiin Indian kristian thlanmualah Pathianni khan vuia phum a ni.
Sams-a hian India pawh a tlawh zing a, tun hi a vawi 12 tlawhna niin Australian team member 42 rualin a ni a, Sultan Ganj atangin Patna thleng Ganges River zawhin lawngin an zin.
An zin kawngah hian a damlo ta a, Munger, Bihar-a mi mal damdawi in, National Hospital-ah dah niin doctor-ten a thih thu an puang a. District thuneituten Indian thuneitute hnenah hrilhin Australian Embassy leh a nupui, Alice Sams te phalna an lak hnuah Munger-ah hian Kristian danin vui a ni ta a ni.
Australian Embassy leh a nupui ngenna angin Kristian invui dan anga vuitu tur puithiam ruahman a ni a, a ruang pawh endik a ni lo bawk a. Churamba-a Kristian thlanmualah phum a ni ta a ni.
Munger District Magistrate Avnish Kumar Singh chuan vuina inkhawm hi embassy-in kaihhruaina a siam ang zela kalpui a ni tih a sawi.
“A nupui, Alice-i duh angin a ruang hi post-mortem a ni lo va. A chuanna lawng hi Zirtawpni khan Babua Ghat-ah dingin Inrinni chawhnuah khan an chhuak leh chauh a ni,” tiin district magistrate hian a sawi.
Sams-a hi Australia sorkar hnathawk officer chawl tawh a ni a. A nupuiin a sawi dan chuan a pa hi British rorel lai khan Assam-ah hna a lo thawk tawh thin a. A pa hriatreng nan India a tlawh apiangin Assam hi a tlawh ziah nghe nghe.
Tun hi a vawi 12 tlawhna a ni a, a zin apiangin Sams-a hian Ganhes luiah Kolkata atanga Patna thleng lawngin a zin ziah a. India a ngaina hle a, India-a phum ngei a duh thu pawh a sawi zing a. A duh chu tihhlawhtlinsak a ni ta a ni.