A GUIDE TO SMART FARMING – 22

By RK Dawla
Mb 9366095658
1. June thla kan thleng ta reng mai. Chutih laiin ram pum huap ang chuan, ruahtui kan la dawng mumal lo êm êm. Kawrte tui luang ri takngial pawh hriat tur a la awm lova. Favang chhovah erawh ruahtui a mumal chhoh deuh beisei ila. Ruahtui mumal har hi Lo leh huan tam berah pawh hnim a tlêm phahin, a awmchhun pawh an than a chak loh phah mêk a nih hi. Chutih laiin, kan tun dinhmun mêk hian engtin nge kan ecology lamah nghawng a neih chhoh dawn tih kha thil ngaihnawm tak tur a ni bawk.
2. Hetianga ruahtui mumal har hi farmer tam tak tân a pawi fo thin a. Khawi hmunah pawh, soil carbon tlêmna apiang khan an tuar nasa zel dawn a. Tui kham loh te, rannung eichhiat case te soil carbon tlemah chuan a hluar duh hle bawk. Tin, thlai phun tharte pawh Nisa-in a hem khawlo awlsam a, hnâwng leh shade siamsak zui an ngai fo thin, fur khawtha a rei chuan. Tin, kan thlai neihsate pawh, a zar thawlh thâwl kha a tul ve fo thin. Dragonfruit, theihai, lichi, theiherâwt etc te pawh hi, an rah mêk lai pawhin a tang lairil hnawk leh rannung ei chhiat laite chu a paih chi êm êm e. A buk lutuk khan a rah eichhetu rannung an ngampat phah a, natna a neih pawh a punlun phah fo zawk thin.
3. Farmer-te thinlunga awm tura ka duhthusâm fo thin chu, subsistency hi a ni. Hemi atân hian thlai chin chhâwk leh awmze nei tur chi hrang chinpawlh lam a pawimawh thin a. Kan location mil chiah thlai chinpawlh tur kan dapchhuah thiam a tul êm êm bawk. Mahsela, tawngpâwng duhâm ringawt, hmuh apiang huana phun lût tawrh ang chi erawh thil awmze mumal nei lo, âtsona chi khat mai a ni thung. Entirna pe ta ila : Lei ban deuhah tomato kan ching a. Tomato a pâr chiah tih khan, tomato kung bulah bean-thu tuh chiah ila. A hranpaa enkawl a ngai lo chiah a. Bean-thu chu legumes a nih vangin chaw a heh lova, a thang buk sâng ve lova, tomato leitha ei bâng kha a duhtâwk leh chauh thin. Hei hi kan practice tawh atangin a fuh viau chuan a lang. Tichuan, tomato hmunah bean kan thar tel a, a hlawkna a thuah hnih ta daih a. A hranpa tomato, a hranpa bawk bean kha chuan, hmun leh hun, sum leh tha tam tak a mamawh thin a.
4. Tin, farmer-te hi hna rim thawk thin kan ni a. Eitur hrisel leh thianghlim kan mamawh zual bik a. Vaiho tharchhuah ringa inhnangfâk reng turin Pathianin min siam lo bawk a. He challenge hi kan fight a ngai. A awmzia chu Ser huan, fu huan etc kan neiin kan enkawl zau hle a. Mahsela, balhla kan chin tel a tul. A chhan chu balhla hi minerals keng tam leh thlai hrisel lutuk a nih vangin, kan ei khawp tal kan thar khan kan hriselin kan chak phah. Chutiang bawk chuan, Moringa pawh kung 2/1 tal chin a tha. Khawvela thilto hrisel ber Moringa (Drumstick/Sajana) hi regular taka ei turin Zohnahthlâk farmer zawng zawng kan thurâwn e. Dragonfruit huan neite pawh, thlasik laiin a bulah tomato a chin chi êm êm. Dragonfruit chingtute hian leitha pêk lam kan uar êm êm tlangpui a. An ei sên bâk kan pe tlangpui. Dragonfruit rah hun loh lai tak, thlasikah tomato kan chin khan tui kan pe reng a. Chu chu dragonfruit zung pawnlâng tak khan a chhawr ta chiah a. Pân leh khir neuh neuh a neih loh phah a, a kumlehah a rah tam phah bawk a!
5. Pawimawh êm êm chu, farming hi a thawha thawh chi mai ni lovin, a zira zir chi a ni e. Zir peih phawt chuan, keimahni thawh chin zelah pawh hian hlâwkna hmuhchhuah tur a awm teh meuh thin. Chutianga inzir a, hmasawn zelte chu an tlova, belhchian an dâwl a, mi tam ber harsatna tawh thin hian a tibuai ve pha lo fo thin a ni.