A GUIDE TO SMART FARMING – 43

RK Dawla
Mb 9366095658

1. October thla tâwp kan thleng ta. Leilung awmdan tlangpuiah chuan, boruak ro vangin leilung hnâwng a huhil chak a. November thla atang phei chuan, lei a huhil chak tawh hle ang a. December thla a lo thlen phei chuan, khuhtu nei lo leilung phei chu a khi phuk phuk tan ang. Mahsela, thlasik a intan fel hi chuan, Mizorama natna lâr tak thin, bacterial blight a hluar nêp ta thin a. Solanaceae kan tihho – bawkbawn, hmarcha, tomato, amtawk, alu etc hian an tuar nasa thei êm êm. An zîk a vuai a, an kuang a tawih rova, tihdam a har êm êm. Tin, tui leh hnâwng châm rei thei leilungah chuan, thlasik vanglai pawhin an nghal zui tho bawk.
2. Buh thar rang kan seng tlangpui tawh hlawm a. A thar tlai seng a hun têp a. Kan buhseng tawhna ningnawi (buhpawl, buh kung etc) kan kalsan mai mai fova. Hei hi thil uihawm tak a ni. Pâ (mushroom) khawi nân a hman tlâk mai bâkah leitha atân hman zui a remchang êm êm. Thingtlang lo-ah pawh nise, buhseng zawh veleh buhpawl, buhkung leh hnim awm ang angte vawmkhawmin, sipaulin hmanga khuh leh tawp khan a inuptawih thei mai a. Leitha tam tak kan thar thei. Ni hmu tam deuh laiah kan dahkhawm chuan, tuipêk a ngai ve thin a. Hneh taka thla khatah v-2 tuipêk chuan, kumthar rualin buhpawl compost tha tak kan siam teuh thei a ni. Buhpawl tak hi hmun hlaa thiarkhawm tur chuan, a hautak ang hû-in a hlawk lo deuh a. Uptawih hnu-ah erawh chuan thiarvel a awlsamin, hman leh pawh a daihzai ta bik thin. Buh chu cereals (kumkhat thlai zinga chaw heh ber) niin, a rah (seeds) kan lâk tawh hnu pawhin, a kung leh kuangah thlai chaw tam tak a paipawn thin a. Hei hi hmang tangkai zui lova rampalailenga tawih raltir mai kha uihawm tak a ni. Thlai chinna khurah buhpawl tawih kan hmang a nih ngat chuan, thlai an hrisel ngei ngei a. A kumleh thlengin lei a tha!
3. Kumin chu Mizoram pumpui tân kum chhinchhiahtlâk a ni leh dawn a. Kan ram roreltu tur kan thlan hun a lo ni leh ta a. Farmer-te induh theih kum a lo herchhuak leh ta. Inthlan hun puan a ni a. Roreltu nih inchuhin kan han campaign leh ta sang sang a. Inthlan dawn chauha min hmangaihtu, sum leh therhlo rawn tawktarh an awm thu hmun tinah kan hre ru leh ta noh noh mai a. Hengho hi patling, kei ka ni inti ve tân chuan, thingfâk nêna ûmchhuah rum rum a hun khawp mai. An tlanchhia pawh thingthu nung ngei hmanga vawm zui tlâk mawle…Thil chi hrang hrang min tiam a, titheilotute ngei ngei pawh, kan inchhung luma zak map lova an rawn tei luh ngam chuan, thingfâk kan chuh ve thiang a ni lo’m nit Kan chhia leh tha hriatna pawh hmang thei lo tura min rawn veh thlêmtute hi chuan, engahmah min ngai lova, kum 4 dana ar chil zât leka min thlem lungawi an tum a, min hmusit a ni! A nih loh pawhin a tam thei ang ber phût chhuah sauh sauh a, kum 4 chhung min bum tawhna kha kutzungtang pakhat leka bum ve keuh mai tur a ni dawn lo’m nit “Kan hnathawh en ula, min vote leh vote loh tur chu thutlukna nangmahniin siam ang che u” ti ngam Kristian candidate kan la nei thei tlat lo hi a manganthlâk hle mai. Chûngho laka kum 4 dana that leh thata kan indawr zeuh zeuh hi kan ram hian a dam phah lo a ni lo’m nit
4.Thingtlângmi ka ni a. Kuthnathawk ka ni bawk. Keimah ang hi Mizoram mipui 60% vel an ni bawk. Tichuan, keini hian state budget atanga cheng tam tak man thlai chi min ngaihtuahsaktute hi kan mamawh lo tih ka chiang a. Tlo zawka kan hmunhma kan enkawl theih dan tur leh kan thlai thar theih ang angte man man zawka hralhna min ngaihtuahpuitu kan mamawh tih ka chiang. Hawh u, kumin chu kuthnathawh ngai pawimawh roreltu ngei i thlang tawh teh ang u…kan rethei rei lua ta….