By RK Dawla
Mb 9366095658
-- Advertisement --
1. April ni 3 a ni ta a. Khaw awmdan en chuan Summer kan thleng tan niin a lang. Mizoram district thenkhatah chuan, thli leh rial a thawk tan hial a. Kumin chu ruahtui kan dawng hma-in kan dawng pangngai chho dawn niin a lang, a lawmawm hle. Kan Mizoram leilung derdêp tak hian, bawhawk tuarh tuarh ni lo, ruahtui mar deuh a mamawh êm êm si a.
2. Kan ram hi awih tlân tam zawk ngial a nih vangin, kan luite pawh dàidul a tam lo thin a. Hei vàng hian lui tuiin a kam velah leitha (ramhnuai thli hâng) a hnutchhiah nêp thin bawk. Tin, tlang hriam tak inkâr chêp takah lui a awm tlangpui a. Hei vang hian luikam, thlai chinna tur remchâng kan ngah lova. Lui kam hmunhma rem (potential area) kan neih tam tak pawh, inkalpawhna kawngpui that loh vang te, electric power awm loh vangte-in chhawr tangkai an ni lo fo thin. Kan kawngpui nazawng chu sawi loh, kawng lian leh lûn deuhte pawh, a mâm rei hlei thei lova. Hmunhma kumhlun siam a, hnûm taka enkawl tur chuan, kawngpui tha tel lo chuan, a tihngaihna chai a awm lo a ni ber, tun lai khawvelah chuan.
3. Nikum fur laia World Bank Road kan tih mai, Aizawl to Lunglei via Hmuifang kawngpuia tui tling nasa lutukte kha. Mualthuam North leh Haulawng khaw inkara mi kha. Kan khaw bul lawk a ni a, kan hrechiang hle. Politics fei leh phaw atân kan hmang chiam a nih kha. Khati taka tui a tlin tam theih chhan chu tuihâwk luankawr (drainage) mumal awm loh vang mai mai a ni! A hnu-ah drainage mumal an han hâi hnuhnawh a, culvert 1 chiah an siam a, a fel dèr nia! Kuminah chuan tui a tling tawh miah lovang. Khawi laiah mah tuihâwk hi hlauhthawnna tak tak leh chinfel duhna hi kan nei tak tak lovem aw…tih hi rilru-ah a awm fo thin. Farmer ka ni a, Civil Engineering emaw Geology-ah hriat ka nei lo. Hriat chian erawh ka nei – kawngpui tha leh tlo ka mamawh tih hi. Kawngpui tha hi a neih theih, kan Mizoramah hian.
4. Aizawl to Lunglei lama kal thinte chuan kan hria ang. Ramlaitui chhim lam, Sekhum nêna inkar kawng chho mar lai hi, RBM Company-in an metal tirh ata repair ngai mang lo khawpin 1km vel chu a la tha. A chhan chu tuihâwk a inpaih that vâng a ni. Helaiah hian lung tha bik an hmangin a rinawm loh, tin rora/balu/alkatra mix helaiah hian a fuh bik pawh ka ring chuang lo cheu! PWD hian kumkhatah vawi khat emaw sidedrain an rawn clear awrh a ni a (kan area velah hian), hetiang chuan tuihâwkin kawngpui a tihchhiat kan vei tak tak lo tih a chiang. Pot holes pawh a têt laia hnawh vat hian sênso tur tam tak kan vêng thei – Br. YMA-in June-Dec thleng kawngpui kan enkawl tawh vangin hei hi ka chiang khawp mai. Hmangaihna nên kawngpui kan enkawl a, thil a danglam mai!
5. Mizo kan ni a, Mizoram lo hi Zofate Jerusalem tur dang Pathianin min pe lovang. Kan ram hi a zîm êm êm a, mihring kan thâwl hle bawk. Hmangaihna nên enkawl ila, kan ramngaw leh luidung, kawngpui leh khawchhungte hi a nih ang ang hian vawngtha ila, sum tam tak lâkluhna tur zawk a ni. A nihna takah chuan, khawvel huap building ropui hi kan nei pha lo! Engvanginnge Mawlynnong thingtlang khua a lâr êm êmt Thil ropui a awm lo, a nih ang angin an vawngfai a, Asia rama thingtlang khaw fai ber a nih vang a ni! Chu zawng chu! Thildang a awm lo! India ram State dang leh Foreign atanga tlawhtu zozaiten, Mawlynnong thingtlang khaw te reuh tê-a an pawisa thlauh hi a va tam dawn tak êm