China nena kan inanna

Ram pakhata state rethei ber Mizoram leh, khawvela ram ropui berte zinga a lawk zual ni pha China hi, ram inrelbawlna dinhmun lamah khaikhin rual ni lo mah se, inanna lai erawh an nei a, chu chu ‘fa neih tam mamawh’ ve ve an nihna hi a ni.
Khawvela mihring tamna ber ram a nih thin avangin China hian fa neih tlem ‘policy’ a kalpui ngar ngar a, mahse he policy hi an lo kalpui rei deuh a, life expectancy a san avangin upa an tam tulh tulh a, hnathawk thei tur thalai an pung ta si lo a, an mangang chho leh ta hle a. Tunah chuan hma lam hun thlirin hnathawk thei tur thalai an awm lo thuai dawn tih an inhrechhuak leh a, fa nei tam tura infuihna an kalpui leh mek a. Nau piang an lo pun theih nana an hmalakna pakhat chu, college thenkhatah zirlaite chu chawlh pein ‘inngaihzawnna hun’ an hawnsak tawp mai a ni.
India pawh mihring tamna ber dawttu a nih avangin fa neih tlem (family planning) a kalpui a. India ram state lian zawkte tan hei hi tihmakmawh a nih laiin, keini India ram state zinga mihring tlemna ber pawhin kan dinhmun zel tur dawn thui pha lovin ‘family planning’ zawm tha ber berah kan tang a. Chu chu hma lam hun atan thil tha lo tak a ni thei dawn tih hriain tunah chuan kohhran leh pawl hrang hrangten fa nei tam tura inzirtirna an kalpui leh ta a. A sawrkar anga thuchhuah awm chiah lo mah se, he hmalakna hi sawrkar hruaitute pawhin khawi ilo puipunnah an thlawp thu an sawi chamchi thin.
Tun hnaia MSCPCR buatsaih lehkhabu ‘Child Rights Information & Resource Directory’ tlangzarhnaah pawh khan social welfare & tribal affairs minister chuan fa neih tam kawngah tan lak a ngaih thu sawiin, khawvela hnam boral tate hi an tlem vang a ni fo, tiin a sawi a nih kha.
Fa nei tam tura kan infuih rual hian, fa nei tam theite chhawmdawl dan system fel tak siam erawh a pawimawh tih a lang nghal a. Tun dinhmunah hi chuan, fa enkawlna kawnga dinhmun ngaihtuahawm lo zawkte hlei hlei hian fa neih tlem an intihhmuh a, fa enkawlna kawnga dinhmun tleu leh ngaihtuahawm zawk (BPL/EWS) te hian fa an nei tam zawk fo a. Fa nei tam, enkawl ziktluak leh thei si lote hian chhungkaw harsatna bakah khawtlang harsatna a thlen thei tih pawh a takin kan tawng mek niin a lang.
Kohhran leh pawl thenkhatin fa nei tam tura infuihna leh chhawmdawlna kalpui dan an siam hi a lawmawm rualin, sawrkar pawh hian kan dinhmun hi sawrkar laipuiah thlenin ‘family planning’ thilah a bika ngaihhnathiamna neih mamawh kan nih dan tlawhchhanin hmalak dan ngaihtuah thei se a duhawm hle a ni.