BY RK Dawla
Mb 9366095658
-- Advertisement --
1. April ni 10 a ni a. Khua a lum tan ta viau. Summer season kan thleng chho mêk a, boruaka hnâwng tam lam pawh a pung chho tan e. Thli leh rial, têk leh ruahpui lo thlen hun kan hmabâk chho mêk a. Tun ang hunah hian thlai kumhlun thenkhat, thliin a chhem thlûk awlsam deuh chite chu fimkhurpui deuh a tha thin. Thingfanghma a chawrbuk tan a, a kung hi laimu ril nei lo a nih vangin, tun ang hunah chuan a rah ningnawi kha paih a hun. Tichuan, thli na tak lakah a kung a tliak lo deuh. Tin, balhla pawh tuk hun ang ang tuk vat vat a, la tuk hun lo deuh chu mau leh thingtuai emaw hmanga do that vat vat a hun bawk.
2. Leilung atangin thlai eichhetu rannung an rawn puang tan a. Lungphûr phengphehlep (moth), sephung lam chi (beetle), khau lam chi (hopper) leh tuaingâwttê (weevil) lam an rawn keu tan a. Tin, aphids leh whiteflies bâkah leafhopper an rawn nghal thar bawk. Thlai hnah chawrno, hnuai lama kûm tlat kha han keu ila, aphids leh whiteflies colony insiam tantir hmuh tur a awm fo thin. Hêng colony insiam tantir hi hun insiam a, kut hmanga nuai hlum ringawt pawh khan an inthlahpun darh zelna kawngah kawngro thui tak a su thin. A tantira chêt vat lohva, an tam tawh hnu-a chêt chauh chuan, pawi nasa tak an lo khawih hman tawh thin.
3. VUTBUAK NATNA :
Thlai kumhlun la naupang deuhah a hluar duh êm êm. Nikuma a hnah hluiah khan vutbuak natna hrik hian thlasik a tuar chhuak thin a. Hnah hlui hnuai lamah whiteflies colony a awm duh êm êm bawk. Chûng ang paih hunlai chu a la ni zel. Kan paihfai emaw control loh chuan, thlai chawrno-ah an rawn pakai leh mai thin. Vutbuak natna kan huanah, nipui thâwt tantirh laiin, a lêng fo a nih chuan, kan huan chhung thingbuk leh thlai hnah upa deuhah thlasik tuar-chhuak, a chi chhuah tur an biru thin a. Hêng host plant-te hi zawnchhuah a lukhâwng êm êm. Tin, thlaiin calcium leh Potassium a tlâkchham hian, vutbuak natna lakah an zuau bawk thin. Thingtlang lama tam êm êm, thukvut kan tih mai hi a khât tâwka hnephnawl thlai (seasonals) leh thlai kumhlun (perennials) chinna leilungah theh fo a tha. Lei thûr siamrem nân a that bâkah, Potassium leh Calcium hnâr tha tak an ni bawk e.
4. TLUMPI :
Thlai bulbal/kung kan lin thinte an lo ei leh chiam thin. Kan khanghu lin tawhte pawh an lo ker thin a, fû chi phûm tawh chenin an kher thin. Fu chingtute hian DDT hmanga fu chi chiah an hrât viau chhan pawh hi, Tlumpi vên nân a ni. Mahsela, DDT hi a thawk chakin a hlauhawm êm êm a, vawikhat kan hman kha kum 10 hnu thlenga châmbâng thei a nih vangin, hman loh hrâm hrâm a tha e. Fu leh khanghu kung kan linte hi tlumpi laka vên nân Neem castro tharlâm tak veikhat vêl a bi-ah phul tel ila, a vêng ve viau mai. A nihphung hrechiang lutuk lova tûr kan ngam lutuk hi thil pawi tak a ni fo. Awlsam kan zawnnaah harsatna ril zawk kan hmachhawn fo thin. DDT hmanga chiah fu chi atanga kurtai kan eite hi ngaihtuah chian ngai tak leh zirchian ngai takzet thil niin a lang. Tin, DDT hrim hrim hi mithiamte pawhin an that lohna an hmuchhuak hnem thawkhat tawh a. Natna hlauhawm (Dengue, Malaria) thlen thei thosi laka inven nân chauh an suggest tawh a. Chu pawh agri field-ah ni lovin, mihring chenna in chhungah chauh hman tur tih a ni.
Chuvangin, ngun takin thil i ngaihtuah thin ang u. Kan thiltih tam tak hi a pawizia kan hriatchhuah meuh chuan, khua kan lo tlai fê tawh thin e.