De Ligt goal hmanga a ler luah zui Bayern

De Ligt goal hmanga
a ler luah zui Bayern
Jamal Musiala siamsak atanga goal awmchhun thunin Matthijs de Ligt chuan Inrinni zan Bundesliga inkhel pakhatah sikhat faiin SC Freiburg mualah Bayern Munich a chakpui a, he result avang hian Bavarians chuan table-a an hmahruaina an chhunzawm leh thei hram.
Netherlands defender Musiala hian nikum nipui thawt laia Juventus chhuahsana Germany a pan hnu khan Bayern tan goal thum a tilut tling ta chiah a ni.
Freiburg hian karliamta Thawhlehni khan German Cup atangin Bayern Munich hi an hnawtchhuak a, kartawp Bundesliga lamah Bavarians hian phuba an la ta a ni.
Inrinni zan inkhelah SC Freiburg hian goal thun theihna hun remchang neiin, Ritsu Doan chuan goal ban a petper a, Yann Sommer chuan Roland Sallai-a goal tur a dansak bawk.
He thu buatsaih lai thlengin table-a pahnihna luahtu Borussia Dortmund chuan point hnih bawkin an chung chiaha hmahruaitu Thomas Tuchel-a team hi an thlau chhunzawm a; Inrinni zan inkhel dangah 2-1-a pathumna luahtu Union Berlin hnehin point thum an thawkchhuak ve bawk a ni.
Donyell Malen chuan Dortmund hmahruaina goal khungin, Kevin Behrens chuan Berlin siphurh a sut zet a, rawlthar kum 18 mi Youssoufa Moukoko chuan bench atanga lutin chakna goal a thun.
Bundesliga title hnu-hnung 10 tehreng hui fai lengtu Bayern hian a hma kar khan 4-2-a Dortmund hnehin table-ah hma an hruai a, Inrinni zanah hnehna changin an hmahruaina an humhim thei.