A THA ZAWNGA THIL NGAIHTUAH

By Reuben Lalnunthara Hnamte
A tha zawnga thil ngaihtuah tih hi a sap tawng taka positive thinking han tih hi mi tam takah chuan a fiah lehzual maithei. Mihring hi kan inang lo khawp mai a, thenkhat thil a tha zawnga ngaihtuah tlat thin an awmlaiin, a then erawh engpawh mai a tha lo zawng, a thim zawnga ngaihtuah tlat thin an awm bawk. Positive tih leh negative tih chu mizo tawng ang deuh maiin kan hre bel tawh a; Covid 19 atang phei kha chuan sap tawng thiam lem lo pawhin an bel hle a ni. Mihringah hian mi rilru tluang (positive ) deuh leh a thim zawnga thil ngaihtuah (negative) deuh hi kan awm a, a thatna leh that lohna pawh a awm ve ve rualin, a tha zawnga thil thlir thin mi chu kei chuan ka dah pawimawh zawk. Social media – Facebook, Instagram, whatsapp etc. ah te hian mihring rilru chu a lang chiang duh hle. Thufingah chuan “mi â pawh a ngawih reng chuan mifing a lo ni mai ang” a ti a. Social media kan hman tak tak hma kha chuan mi rilru put dan hi kan inhre lo deuh a, tunah erawh chuan social media khawih thang tan chuan a langsar ta hle.
Khaw pakhata kan awm lai hian pa pakhat chu a thil thlir dan hi tunlai tawng takin a positive em em mai a. Committee nikhuaa thil sawiho reng reng hian “A tha khat ang, kan tisual lo vang” tih hi a thupui a ni ngawt mai a. A lehlamah chuan a thil thlir dan kha a tluang lutuk kan tih rual khan, a rilru kha a hahdam em em mai a ni. Engmah sawi leh sel hi a nei lo va, tumah kha a haw lem bawk lo va, a hahdamthlak awm mange ka ti thin. Khaw pakhata kan awm lai bawkin mi pakhat chu a thil thlir dan kha a thim zawng hlir emaw tih mai tur a ni a; tumah mi hmuh that a nei lo va, amah pawh kha tha a inti ngut ang em maw? Committee neih nikhua reng reng hian – thil pangngai tak sawi thluk mai tura kan ngaih te hi a kawi (negative) zawng zel hian a la mai a, a nun kha a hahthlak tak a ni. Tumah a hmu tha lo va, thil tha nia kan hriat pawh a sawiselna tur a zawng zel mai bawk si a, a bula awmte tan pawh hahthlak tak a ni.
Tunlai hun angah pawh hian social media khawih tam chuan mi rilru kawi deuh deuh, mi thil post tha pangngai pawh a chhe zawnga comment duh tlat, inti fing fe fe, tumah hmuhthat nei lo hi an tam em em mai a ni. Social media lo chhuah hma khan he ti em em hian mi rilru tha lo leh kawi, a chhe zawnga thil thlir tlat hi kan tam angem aw ka ti thin. A thim zawnga thil thlir thin chuan a thil tha lo lam a suangtuah vak vak a, tul lovah a in tibuai hle thin. Thil thlir dan tha lo, a thim zawnga hlir thil kan thlir hian kan rilru a tihah a, hmasawnna a tithuanawp a, nunkawng dik lovah min hruai thin a ni. Mahni intihlum kan tih te, rilru buai kan tih tamtakte pawh hi a chhan pakhat chu a thim zawnga thil an thlir thin vang a ni. Sir Winston Churchil-a chuan, “A thim zawnga thil thlir thin mi chuan hun remchang zawng zawngah harsatna an hmu thin a, A eng zawnga thil thlir thin mi chuan hun harsaah pawh hun remchang an hmu thin,” a ti a ni.
Khawvel leh kan nun dan pawh hi dai pawp (risk) a nih chin a awm a, engmah a thatna tur emaw, hlawkna tur emaw, kan chhiatpui dawn nge kan thatpui dawn tih hre hauh lova kan zuan luh tawp chin hi a awm a ni. A lehlamah chuan a dai ( risk) huai huai hian eizawnna kawng leh kawng dangah pawh an tifuh zawk emaw tih mai tur a ni thin a. A thim zawnga thil thlir tlat mi chuan engmah hi an dai (risk) ngam lo va, an hmakhua kha a thim zawng hlir an thlir avangin, an fimkhur lutuk hi an fim – khur mai a ni. A eng zawng(positive) a thil thlir thin mi chuan harsatnate, natnate an tawh chang pawhin Pathianah an lawm zel thin. Mi lawm leh hlim thin mi chuan an nunah hnehna an nei sa a, harsatnain a tibuai pha ve ngai lo. Khawvel hi a thim zawng hlirin thlir ta ni ila chuan eng kawngah mah hlawhtlinna kan nei ngai lovang.
Ziaktu pakhat chuan, “Beiseina nei tawh lo mihring chu khawvela mi khawngaihthlak ber an ni ang” a lo ti a. Mi rilru beidawngte tluka mi hlauhawm khawvelah an awm kher lo vang. Beiseina nei tawh lo, a thim zawng hlir thil ngaihtuahnaah chuan tualthahna te, ruihhlo bawiha tanna te, midangteah chhiatna thlen tir te, mahni nun ngei pawh lak mai duhnate leh rilru buainante a thlen thin a ni. Pathianin he khawvel hi hlim taka mihringte kan chen hona tur min buatsaihsak a ni a, thlarau khawvel mai ni lovin, he khawvelah pawh beiseina tha nei chunga, a eng zawnga thil thlir thin a, hlim taka awm turin min duh a ni. Khawvel leh kan ram ngeiah pawha tualthahna leh midangte tan pawh chhiatna thlen thin mi chu mi beidawng, a thim zawnga thil thlir thin mi an ni. Hebrai thufing chuan “Mi chu a hlawhchhamna chhiar theih a nih chuan mi ropui a ni,” a ti a. Hlawhchhamna karah pawha a eng zawng thil thlir tlat mi chuan hlawhtlinna a hmu thin. Kan damchhung rei lo teah hian he khawvel hi vanrama kan siam theihna tur chuan a eng zawng/a tha zawng thil thlir thiam hi kan zir a pawimawh hle.
William L. Brownella chuan “Engpawh lo thleng se beiseina leh rinna hi hloh ngai suh,” a lo ti a. Mi te chunga kan beidawng a nih pawhin Lalpaah rinna nghat tlat ila kan tisual ngai lovang. Beiseina leh rinna hloh hi thli hlauhawm tak a ni a, beiseina neih tawh lote phei chuan a thim zawng hlirin khawvel hi an thlir thin. A eng zawng leh a tha zawnga thil thlir tur chuan Pathiana rinna nghah tlat mai hi a pawimawh khawp mai. Keini Kristian ringtu phei chu ring lo mite aiin nasa takin kan vannei a. Engkim ti thei Pathian, awm lo atanga awmtir thei tu, amah hnaihtute tlansan ngai lotu kan neih tlat avang hian kan vannei bik em em a ni. Kan ram kalphungahte, kan khawtlang leh chhungkuaah te beidawnna nasa tak kan nei a ni maithei e. Pathianah rinna nghat tlat ila, amah hnaih ila, Lalpan ram hruaitu tha min pe ang a, kan chhungkua khawtlang min chinfel sak mai ang. Ram hruaina hnate hi Pathian thu vek a ni a, Pathian duh loh zawnga awm hi keini ringtu ram angah phei chuan hlauhawm tak a ni. A duh loh zawng chu a paihthla ang, a duh zawng chu an lo ding chhuak mai dawn a ni. Engpawh ni se, kan nunkawng leh eizawnna leh kawng dangah pawh a tha zawng leh a eng zawngin thil i thlir phawt ila, tichuan a tha ang a, kan tisual lovang.