A hianha ber hnehtu Sabalenka

Khelmual chhungah thiantha a sawi theih miau si loha French Open title a beiseina kawngah Inrinni zan khan Aryna Sabalenka chuan a best friend Paula Badosa hnehin fourth round a lut.
Australian Open hard court-a Grand Slam singles title pahnih sualchhuak ve tawh Belarusian hian a French Open title hmasaber tur a beisei mek a, a kalkawngah Spanish world number two hlui Badosa a awm a, inthian tha em em ni mah se second seed Sabalenka tan 139th-ranked Badosa chu hlahthlem ngawt mi a ni bik si lo a, 7-5 6-1 hnehna nen third round a paltlang.
Nikuma French Open semi-final lut Sabalenka chuan a best friend nena inkhelh boruak chu a harsa tih sawi chungin point tinah a fight a, a theihtawp a chhuah vek tih leh serve tu nih pawhin advantage a keng tel lo niin a sawi.
Sabalenka chuan, “Nang pawh ni la i best friend khelh chu hautak i ti ve khawp ang, mahse, thil han thliarhran dan kan hria a; hliam atanga a lokir hnuah ropui takin a inlan kal mek a, a khelh that theih ber hun hi a tawngbaw thuai ang,” a ti.
Kum 26-a upa Sabalenka hian a major title pathumna tur a beisei mekna kawngah American 22nd seed Emma Navarro a hmachhawn leh ang.
Miami lama inbuatsaihna tournament-ah a thiannu Sabalenka hneh loin a tlawm a, Stuttgart-ah intum nawn lehin, kha mi tum khan hliam avangin a khel tluan thei lo a, French Open-ah Belarusian nen bawk an insut leh a ngai a, kum 26 mi ve bawk Badosa chuan hnehna chan ve tawh ngei beiseiin khelmual lut mah se ranking-a an inthlauh ang tiat thuakin a khelhah pawh a khan lo deuh niin a lang.
Inrinni khan Paris-a khelmual chung khuh lohte chu ruahin a tibuai leh a, Sabalenka-te thiandun erawh chungkhuh nei Court Philippe Chatrier-ah ruah tihbuai lohin an inkhel a; he court-ahhian fourth seed Elena Rybakina pawh a chak ve bawk.
Beisei loh result kan hmuh tharlam berah Australian Open finalist Zheng Qinwen chuan world number 70 Elina Avanesyan a hneh lo.