A hma aia nasa zawkin ruihhlo kan do dawn – Chief minister

Tunhma zawng aia nasa in sawrkarin ruihhlo do a tum dawn tih chief minister Lalduhoma chuan a sawi.
Ruihhlo Do Core Committee chu Thawhlehni khan an chairman, chief minister hoin an thukhawm a. Ruihhlo do kawnga hma lak zel dan tur an duang.
Chief minister chuan, Ruihhlo Do Core Committee thutkhawm hnuhnung ber chu kum 2022 ah a ni tawh a. Thukhawm tam lo mah se, tha thlah loin vawiin thlengin ruihhlo do hna an lo thawk ngar ngar chu an lawm hle tih a sawi. Sawrkar tharah tunhma aia nasa leh hlawk zawka ruihhlo do an tum dawn tih sawiin, ruahmanna tha leh tangkai tur an duang anga, sum leh pai mamawh tur pawh a tul angin an ngaihtuah zel dawn tih a sawi a ni.
Home minister K Sapdanga, Social Welfare minister Lalrinpuii leh Excise & Narcotics minister Lalnghinglova Hmar te pawhin an department kaltlanga hma an lak dan an sawi a ni.
Supply tihtlem kawnga hmalakna chu Excise & Narcotics lamin kengkawh se, an ti a. Ruihhlo supply titlem tura sum leh pai mamawh, a dona lama sawrkar puitu tlawmngai pawlte hnena thuneihna pek dan tur leh an hmanraw mamawh pek dan tur an rel. Ruihhlo ngaite enkawlna lam chu Social Welfare-in kengkawh se, an ti a. Hmalak mek leh hmachhawp sawi niin, TNT Lunglei building sakna tur hmuh a ni a, De-addiction Centre sakna tur Ministry of Tribal Affairs lama dap mek a ni a, District Jail pasarih thuamthat tum a ni. Ruihhlo ngaite enkawlna lama thawhpui tur foreign lam thlenga dap a nih dan sawi a ni bawk.
Thawhtanni khan Ruihhlo Do Core Committee hnuaia Working Committee on Ruihhlo Do chu an chairman, Social Welfare minister Lalrinpuii hoin an lo thukhawm tawh a. State level, district level leh village level thlenga nasa zawka hma lak dan tur relin, hmalakna atana ruahmanna an siam chu Core Committee thutkhawmah hian an chhawp a ni.