A hmangaih che tih sawi lovin a lantir

Kan kawppui ten “Ka hmangaih che” tih tawngkam an sawi khat deuh a ni maithei, mahse, an hmangaihna chu tawngka ni lo, chetzia emaw thil tih emawin an lantir ve thin a, chu chu kan hriatthiam a tul hle a ni. Min hmangaihna lantir nan a thil te kan hriatsak loh a, kan hmuh thiam loh fo chuan kan inkarah boruak tha lo a awm phah thei hial dawn a ni.
An sawi loh avangin min hmangaih lo tihna a ni lo va, a nachang an hriat loh vang leh, heti lama an hawizau tawk loh vang te, an zei loh vang te pawh a ni thei. An sawi loh vanga min hmangaih ta lo anga ngai a, chu chu kan chetziaa kan lantir ve leh thung emaw, tawngkaa kan sawi chhuak emaw a nih chuan boruak a ti tha lo ve thei tlat.
Tun tumah hian relationship lama mithiam ten kan kawppui ten min hmangaih a ni tih an lantir thin dan hrang hrang kan rawn tarlang e.
1. Khawlaia inkal dunin, motor a tam viau phei chuan, i kawng kân tur che a ngaihtuah che a, i chetsual palh hlau takin a awm thin. Chu chu sawi chuak kher lo mah se awlsam takin a awmdan atangin a hriat theih. Hei hi thil hotê angin lang mah se a hmangaih che a, a ngaihtuah ve a, a ngaihven che tih lantirna tha tak a ni.
2. Eitur chungchangah i ei duh ve ngei tur ni a a rin chu a lo khek hram hram thin che. Thil tui intih zawng tak inei dun a, a ei zo tuah tang duh lovin, a khek thin che. A hmangaih hle che tihna a ni. I ei duhzawng a hria a, i ei ve loh a hlau a, i duhkhawp i ei loh a hlau a, a khek che a nih kha. A hmangaihna che a lantirna a ni tih hrethiam ang che.
3. I tihsual leh tihdik lohah te pawh a hau che a, a vin ve fo ang che. A vin che avang khan a hmangaih lo che tihna a ni lo, i thatna tur a duh vang zawk a ni thei. Mahse, a engamah hmaa bak nghal hlar ringawt mai chu a dik chuang lo. A hrilh nawn fo tawh che a, i che fuh hleithei lo a, a duhsak vang zawk chein a vin ta mai che a ni. I dik lohnaah pawh a hauh ngai loh che a, a en liam mai mai che chuan a hmangaih lo che tihna a ni zawk. Min hmangaih a, kan thatna duhin min hau a ni.
4. I kalna turah “I thleng tawh em?” te a rawn ti a, lo ning mai suh. I tluang em? tih te a, i kal tumna i thleng thei em tih te a hriat duh vang a ni. A ngaihtuah vang che a ni. Nangman i thlen chin engmah i hrilh loh pawhin, “Eng nge i an?”, “Khawilai nge in thlen tawh?” “In tluang em?” tih te a rawn zawt fo ang che. A hmangaih che a, a ngaihtuah che tih a lantirna a ni.
5. A programme a thulh phah fo. I tel ve lohna tur thil tihna, a kalna tur leh an sawmna te a thulh fo a, thiante nena inhmuhkhawm leh thil tihho an tum te pawh nangmah vangin a thulh fo. A thulhna chhan hi i nawmsam loh vang te, eng emaw thilah kal lo tura i duh vang te pawh a ni thei. A kal loh avangin a mood a off deuh pawh a ni thei, mahse, a kal loh khan a hmangaih che a, a ngaipawimawh che tih a lantir a ni.