Tlawng lui leh a chhehvel hmunhma vawnfai leh humhalh kawngah leivung leh bawlhhlawh paih ru thinte venna atan chhun zan zawma hman tlak camera nena thuam check gate siam tum a ni.
-- Advertisement --
Save Mizoram Rivers-in rawtna a siamte bawhzuina atan Nilaini khan Aizawl khawpui tui lakna Tlawng lui chu leivung leh bawlhhlawh laka ven theih dan State Planning Board vice chairman H Rammawi hoin enfiah a ni.
Thudawn danin Tlawng lui panna Lawipu leh a chhehvel kawngpui leh kawngthlangah bawlhhlawh leh in sakna hmanrua hluihlawn tawhte a rem lai laiah lirtheia paih a ni fo a, hei hian khawpui dai hmunhma tih tawp bakah a thlanga lui, Aizawl khawpui tui lakna ber tan pawh him loa hria in, hemi veng tura hma lak ho rel a ni a. Leivung leh bawlhhlawh paihtute hian midang hriat loh lai remchang an chuh thin avangin CCTV nena thuam check gate – Lawipu Veng leh Nursery Veng ah dah tumin ruahmanna siam a ni.
Heng hmun enhonaah hian SPB vice chairman hi Aizawl Municipal commissioner Zothanmawia leh Save Mizoram Rivers aiawh bakah Lawipu, Maubawk leh Nuresery local council leh YMA lamin an lo tawiawm a, check gate siamna tur leh duty-te awmna turte ena ruahman ho a ni.