A hun ngaiah Mizoram inthlan ring
Parliament Session an zo a, Mizoram inthlan hun sawn tumna lam
hawi a lang lo. Rajya Sabha MP K Vanlalvena chuan thu thar a awm a ring lo; a hun ngaiah Mizoram a inthlan a ring.
India sorkarin state hrang hrang a ruala inthlan, Lok Sabha inthlan nena a ruala tih ni se tih an tuipui a, parliament-ah pawh hemi chungchang ngaihtuahtu committee an din. Mizoram leh state dang pali, kumin kum tawpa inthlang turte pawh nakkuma Lok Sabha inthlan ruala inthlantir tumna a awm ring an awm. Mahse parliament session, Ningani zan thlenga neihah chuan hemi chungchang hi a lang lo.
Thawhtanni atanga Ningani thleng khan parliament-ah hian special session an nei a, hetah hian Lok Sabha leh state hrang hrang a ruala inthlanna tur ‘One nation, one election’ chungchang putluh a nih rinna a awm. Parliament-a an tih turah a lang lo chung pawhin putluh thut a nih rinna a awm tho. Mahse putluh a ni ta lo.
“One nation, one election chungchang putlut a ni lo a, uniform civil code chungchang pawh putluh a ni lo. Kei chuan a hun pangngaiah kan inthlan ka ring,” Rajya Sabha MP K Vanlalvena chuan a ti.
November thla tawpa tanin December ni 23 thleng winter session a awm leh tur thu a sawi a, chutah chuan an pulut a nih pawhin Mizoram a nghawng hman tawh dawn lo tih a sawi.
Budget session, monsoon session leh winter session a awm thin thu leh winter session hmabak a la nih thu a sawi a, kum khatah vawi thum tal session neih tur tih a ni a, tunah special session a awm avangin session hi vawi thum chu a awm tawh tih te a sawi a, mahse special session-ah mi thenkhat beisei angin ‘one nation, one election’ chungchang putlut a nih tak loh thu a sawi.
Putluh a la nih tho a rinawm thu a sawi a, BJP chauh ni lovin party dang pawhin tha an ti tih te sawiin, party hrang hrang telna committee pawhin tha an ti tih a sawi.
“Keini min nghawng theih dan tur chu, winter session neih hmain special session ko leh se, chutah chuan pulut se, pass ta se, chutiang a nih chuan kan inthlan an sawn thei chauh ang,” K Vena chuan a ti.