A hun tawpnaa chak zo lo Suarez

A hun tawpnaa chak zo lo Suarez
International football chawlhsan tura thutlukna siam fel ve ta Uruguay forward hmuhnawm ni thin Luis Suarez chuan Zirtawpni zan khan ram tana a match hnuhnungber khelin South American World Cup qualifier-ah Paraguay a hmachhawn a, an ram khawpui Montevideo-a Centenario stadium-ah ram pahnih hi goal awm loin an inhnehtawk a, amah thlahna inkhel ni nghalah goal a khung zo lo.
Tarlan tawh thin angin, kum 37 mi Suarez hian ram tana kum 17 zet a inkhelh chhung khan game 143-ah goal 69 khungin Uruguay player awm tawh zawng zawng zinga international goal thun hnem ber a ni.
Kumin July thla Copa America-a pathumna luahtu Marcelo Bielsa team Uruguay khan an regular player panga ngawt tel loin bul an tan a, chu’ng zingah chuan South America khawmualpui ramte inelna lianbera fans nena an intihbuai avanga hrem tawk Darwin Nunez a tel.
Uruguay hian an kawtkai inkhelah goal thun theihna hun remchang vawi duai lo an bawhpelh a, chu’ng zinga langsar tak pakhat chu first half-a Suarez-a’n a ke dinglam hmanga goal ban a chhuihper kha niin, kha ‘chance’ tha zet kha Facundo Pellistri chhawpsak a ni nghe nghe.
Paraguay lam pawhin ‘clear-cut chance’ han tih tur an siamchhuak ve tho a, Miguel Al miron goal tur ni ngeia lang hman tawh chu Uruguay goalkeeper Sergio Rochet chuan a danchahsak.
Point khat an hmuh belh leh nen point 14 hum chungin Uruguay hian South American World Cup qualifying standing-ah pahnihna an luah chhunzawm zel a, point liin hmahruaitu Argentina an pha lo.
Naktuk zan hian Venezuela an hmachhawn zui leh ang a,m inkhel dangah Paraguay leh Brazil an intum thung ang.
Brazil 1-0 Ecuador
Kumin Copa America quarter-final match-a Uruguay an hneh loh hnua khelmual an luh leh vawikhatnaah Zirtawpni zan khan Brazil chuan first half-a Real Madrid forward Rodrygo goal khat thun hmangin hnehna an chang a, South American World Cup qualifier standing-ah point 10 neiin palina an luah pha hram a; hmahruaitu Argentina lakah point riat zeta hniamin, 2026 World Cup final round thleng phakna dinhmun hniamber parukna luahtu Ecuador lakah hian point hnihin an sang thung.
World Cup champion vawinga ni tling awmchhun Brazil hian Ecuarod lakah inkhel thunun hneh hle mah se hun pumin goal thun theihna hun remchang siamchhuah an harsat leh tlat a; ball pass sual an ngah bawk a, an tlarhma luahtute tan ball tha chhawpsak an harsat a, Ecuador tlarhnung khawng char bur thiah dan kha an man lo a tih theih ang!
Ecuador lamin tharum an hmang nasa hle a, goal venhim a ngaih loh laia goal an zawn ve zawk zawk tumin an forward pathumte an thawkrim a, mahse, goal em erawh an hlawhchhuak zo ta lo a ni.
First half chhung khan Brazil lamin goal zawnah tum hnih chiah ball thawnlut zo mah se darkar chanve khelh tlin dawn chiaha Rodrygo ball zawk khan Ecuador goalkeeper a pel hlauh a, kha kha chak mamawh Brazilian-hoin an chakpui thei hram a ni.
Chawlhlawk zawhah Ecuador khan an siphurh sutna hun remchang hmu mah se Brazil defender Gabriel Magalhaes chuan last minute tak takah goal line atangin Moises Caicedo goal tur hmunhimah a hnawlchhuahsak hman hram a ni.
Second half-ah khan Brazil an talbuai zual a, khel tha lo Vinicius Jr khan chawlhlawk hnua goal zawna ball an thawnluh awmchhun minute 45-ah siamchhuak mah se goal-ah a chang zo lo a; inkhel a tawp rualin Brazilian fans-in an team khelmual chhuahsan tur an boo khum ruih ruih atang khan hnehna chang hram mah se supporter lungawina an thlen zawh lohzia chu a langchiang thawkhat viau awm e!
Inkhelh banah Rodrygo chuan Brazilian TV Globo hnenah kha match-ah khan engti hawi zawng pawha chak hrim hrim an mamawh thu sawichhuakin, an chak dan chu mawi lo deuh pawh ni se duhthlang thei an nih loh thu a sawi a, chak zawh loh leh ai chuan mawi lo deuha chak pawh an thlang vek ang tih hrilh chungin hnehna an chang thei leh chakna goal khungtu a nih avanga a hlim takzet thu a sawi a, kha result khan hmalam an pan zelna turah a pui hle dawn niin a sawi.
Brazil hian Thawhlehni zan hian Asuncion khawpuiah mualneitu Paraguay an luhkhung ang aa; zaninah Ecuador-in Quito khuaah Peru an mikhual ve bawk ang.