A hun tur sawi lovin Israel-in Rafah crossing hawn tum

Israel chuan Gaza leh Egypt inkalpawhna, Rafah crossing chu Palestinian-te an luh chhuah theih nan an hawng dawn tih an sawi a, a hun tur erawh an sawi lo va. Hamas chu US-in palai hna thawka inkahhai kalpui mek chu a an bawhchhia niin an puh bawk.
Hamas-in an mi hren thi tawhte ruang an hlan chungchangah inrem lohna an neih bakah hel pawl hi an ralthuam tung ngei tura an duhna leh Gaza kal zel dan turah an la inrem lo bawk.
Israeli sorkar thupuangtu, Shosh Bedrosian-a chuan Ningani khan Israel chu inremna an neihah an la ding reng a, kaltlangpui zel pawh an tum tih thuthar lakhawmtute hnenah a sawi a. Hamas chu ruang an la hlan loh 19-te hlan turin an phut bawk.
Hamas hian ruang 10 chuang an hlan tawh a, Israel hian pakhat hi an mi a ni lo tih an sawi thung a. Hel pawl hian ruang an hmuh tawh chin chu an hlan vek tih an sawi.
Hamas sipai pawl chuan ruang dang pawh an hlan dawn tih an sawi a; mahse, indona avanga in chim chhia leh hnawk tam lutuk avangin zawn hmuh mai an harsa a, khawl lian hmangin zawn a ngai niin an sawi.
Ningani khan Hamas hotu lian pakhat chuan Israel-in Zirtawpni atang khan inkahhai bawhchhiain mi 24 vel an kap hlum tawh niin a sawi a, heng an bawhchhiatnete hi palaite hnenah an thlen dawn tih a sawi.
Israeli sipaite chuan hei hi an la sawi fiah lo va, a hma khan Palestinian thenkhatten warning an pek an hlau lo va, an tana hlauhawm hnawh kian nan silai an hmet puak tih erawh an lo sawi tawh.
Ningani zanah khan tual chhung damdawi in thuneituten Israeli-ten thlawhna atanga Gaza chhim lama Khan Younis an kahah mi pahnih an thi tih an sawi a. Israeli sipaite chuan lei verh atanga lo chhuak, sipaite lam pante an kap tih an sawi ve bawk.
Israel hian US President Donald Trump-a’n indona tihtawp nana rawtna 20 a neih kalpui zel dan tur sawiin Hamas chu an ralthuam daha thuneihna chang zui lo turin an duh a, hei hi lehlam hian an duh lo thung.
Hamas hian Israel-te chhuahsan hmun luah leh mekin mi tihhlum leh chibil hel eng emaw zat nena intihbuaina an nei leh tawh.
Inremna angin Thawhtanni khan Hamas hian an mi hren dam laite an chhuah a, Israel-in Palestinian an man sang chuang an chhuah bawk a. Gaza health ministry chuan Ningani pawh khan Israel hian buai chhunga Palestinian an thah ruang 30 an hlan leh bawk tih an sawi a, ruang 120 an dawng tawh tih an sawi.
Ningania Israeli sipai tanpuitu pawl, COGAT chuan Egypt nen indawrin Rafah crossing hawn tum mek a ni tih a sawi.
COGAT hian Rafah crossing hi puihna phurh luh nan erawh hman a ni danw lo va, puihna thgil chu Israeli-te thunun, Kerem Shalom kaltlanga tih tur niin an sawi.
Italian news agency ANSA chuan Israeli Foreign Minister Gideon Sa’ar-a’n Rafah hi Pathiannia hawn hman tum niin a sawi tih an tar lang.